Македонија официјално стана дел од големиот глобален проект на ФИФА насочен кон развој на базичниот фудбал. Денес во Босилово беше свечено отворен првиот фудбалски терен изграден во рамки на иницијативата „FIFA Arena“, проект кој има за цел да создаде врвни услови за игра и развој на децата и младите во руралните и урбаните средини.
На свечената церемонија присуствуваа првите луѓе на македонскиот фудбал, претседателот на ФФМ, Масар Омерагиќ и генералниот секретар Леонид Јендреоски, како и високиот гостин од Цирих, директорот на ФИФА за национални асоцијации, Елкан Мамедов.
Инвестиција во иднината на нашите деца
Претседателот на ФФМ, Масар Омерагиќ, во своето обраќање потенцираше дека овој проект е многу повеќе од само обична спортска инфраструктура.
„Ова не е само инвестиција во терени, туку инвестиција во здравјето и правилниот развој на нашите деца. Со ‘FIFA Arena’ испраќаме порака дека секое дете во Македонија заслужува еднаква шанса да игра фудбал, без разлика каде живее. Босилово и Турново се само почетокот на оваа убава приказна која ќе се шири низ целата држава“, изјави Омерагиќ.
Глобална мисија со македонски потпис
Директорот на ФИФА, Елкан Мамедов, истакна дека крајната цел на овој проект е поставување на 1000 нови терени ширум светот, а Македонија е меѓу земјите кои први ја реализираат оваа визија. Новиот терен во Босилово ќе биде примарно наменет за локалните фудбалски школи и децата вклучени во масовниот проект „Фудбал во училишта“.
ФФМ со поддршка на ФИФА продолжува со стратегијата за подобрување на инфраструктурата, верувајќи дека токму децата се најважната основа за секој иден успех на македонскиот фудбал.
