Иако Реал Мадрид извојува победа од 2-0 против Реал Овиедо во претпоследниот домашен натпревар од сезоната, фудбалот падна во втор план. Славниот „Сантијаго Бернабеу“ стана арена на незадоволство, протести и неочекувани кавги меѓу навивачите и раководството.
Тензиите го достигнаа врвот откако 79-годишниот претседател Флорентино Перез неодамна свика вонредни избори, истовремено негирајќи ги шпекулациите за негова оставка или тешка болест.
Обезбедувањето присилно отстрануваше транспаренти
Уште на самиот почеток на мечот, на трибините беа истакнати транспаренти со пораки „Florentino, vete ya“ (Флорентино, оди си веднаш) и „Florentino, culpable“ (Флорентино, виновен). Сепак, тие не останаа долго – обезбедувањето на стадионот реагираше експресно и присилно ги отстрани транспарентите од рацете на навивачите.
Ситуацијата дополнително се зовре кога камерите го уловија самиот Перез како влегува во жестока вербална расправа со навивачите кои седеа под претседателската ложа, гестикулирајќи луто кон нив.
„Ѕвездите“ на удар: Свирежи за Мбапе и Винисиус
Не поминаа добро ниту најголемите ѕвезди. Винисиус Жуниор, кој го предводеше тимот како капитен, добиваше свирежи речиси при секој контакт со топката. Уште полошо помина Килијан Мбапе – неговото име беше исвиркано уште при најавата на составите, а кога влезе во игра во второто полувреме, „Бернабеу“ го „почести“ со свирежи.
Незадоволството кон Мбапе е резултат на неговата контроверзна објава на Инстаграм за време на поразот во „Ел Класико“, додека тој беше на трибините поради повреда. По натпреварот со Овиедо, Мбапе изјави дека тренерот Алваро Арбелоа му кажал дека е „четврти напаѓач“ во тимот, тврдење кое Арбелоа подоцна експресно го демантираше на прес-конференцијата.
„Мора да ги прифатите свирежите. Тоа е мислење на фановите и не треба да се сфаќа лично. Никој нема да умре вечерва. Нормално е кога не победувате, луѓето да бараат виновници меѓу играчите“, изјави Мбапе смирено по натпреварот.
Белингем со порака до трибините
Победата ја потврди Џуд Белингем во 80-та минута, кој исто така беше цел на дел од свирежите при влегувањето во игра. По постигнатиот гол, Англичанецот не славеше еуфорично, туку само ги подигна двете раце кон навивачите во знак на неверување за атмосферата во клубот.
Реал Мадрид сега заостанува 11 бода зад шампионот Барселона, а со оглед на внатрешните превирања и војната меѓу Перез и навивачите, претстојното лето во Мадрид ќе биде пожешко од кога било.
