Македонскиот фудбалски „дијамант“, Елиф Елмас, и официјално ја заврши својата втора, емотивна епизода на југот на Италија. Иако нашиот репрезентативец минатата сезона ја помина како позајмен играч во таборот на Наполи, клубот одлучи да не ја активира откупната клаузула од 17 милиони евра, со што позајмицата формално заврши на 30 јуни 2026 година.
На официјалните профили на италијанскиот гигант беше објавено емотивен пост со порака која ги допре срцата на сите искрени навивачи: „Неапол секогаш ќе биде со тебе. Со среќа Елиф 💎“. Македонскиот ас веднаш се огласи во коментарите со кратки, но силни зборови напишани со големи букви: „БЛАГОДАРАМ ЗА СЀ, НАПОЛИ 💙“.
Експлозија од емоции и бес кај „наполитанците“
Одлуката на раководството да не го задржи 26-годишниот фудбалер предизвика вистинска лавина од коментари и отворен бунт меѓу навивачите на социјалните мрежи. Под официјалната објава, илјадници фанови го изразија своето незадоволство, потенцирајќи дека клубот прави огромна грешка со пуштањето на играч кој никогаш не се пожали, не направи ниту еден скандал и буквално „ги оставаше белите дробови“ на теренот.
„Катастрофална грешка е што не го откупивме. Каде ќе најдете ваков квалитет, на оваа возраст и за оваа цена? Тој е еден од ретките кои искрено го сакаа овој дрес и овој град“, гласи еден од најлајкуваните коментари на револтираните навивачи. Друг навивач емотивно додаде: „Елиф, ти засекогаш остануваш Шампион на Италија и дел од нашата историја!“
Napoli sarà sempre con te. In bocca al lupo Elif 💎
— Official SSC Napoli (@sscnapoli) June 30, 2026
💙 #ProudToBeNapoli pic.twitter.com/UJ0BWNa6h5
Мистеријата наречена иднина… Германија или… Торино?
Иако на почетокот на летото силно кружеа чаршиски муабети за интерес од премиерлигашот Астон Вила, тие шпекулации стивнаа. Во моментов, единствениот конкретен интерес во Италија доаѓа од страна на Јувентус, каде што неговиот поранешен тренер Лучијано Спалети исклучително ги цени неговите квалитети и поливалентност.
Сепак, тоа во моментов се само странични најави. Реалноста е дека нашиот бисер формално се враќа во сопственост на РБ Лајпциг, со кој има важечки договор до 30 јуни 2028 година. Дали Елиф ќе остане во Германија за да се докаже во Бундеслигата или преодниот рок ќе донесе нов пресврт, останува да видиме. Едно е сигурно, Неапол никогаш нема да го заборави својот македонски дијамант.
