На 40 години, повеќето фудбалери одамна се во пензија, раскажуваат приказни за славните денови. А, Тијаго Силва? Тој сè уште ги пишува своите.
Бразилската легенда, кој и сега на 40 години игра на ФИФА Светското клупско првенство со неговиот клуб од детството Флуминенсе, е дефиниција за страст, дисциплина и лудо долга кариера – дефанзивец чија приказна изгледа како филм кој сè уште нема крај на повидок.
Од фавелите на Рио, до врвот на светот
Тијаго Емилијано да Силва е роден во фавелите на Рио де Жанеиро – место каде се раѓаат многу фудбалски соништа, но малку од нив преживуваат. А, неговото патување речиси заврши уште пред да почне.
Како тинејџер, Силва се соочи со тешка болест – туберкулоза. Многумина веруваа дека неговата кариера е завршена, а лекарите му рекоа дека можеби никогаш нема да заигра повторно.
Но, откажување не е збор што постои во неговиот речник. Тој се избори и се врати посилен, а токму таа борбеност ја носи со себе цела кариера.
Подемот на дефанзивниот Маестро
По првите чекори во бразилскиот Флуминенсе, талентот го однесе насекаде ширум светот – од Порто до Динамо Москва – но, вистинскиот европски блесок дојде во дресот на Милан.
На Сан Сиро Силва стана еден од најдобрите дефанзивци во светот. Како клучен играч на “росонерите”, тој покажа вистински лидерски дух и играч кој го чита теренот како ретко кој, способност која беше клучна за освојување на трофејот во Серија А.
Потоа следеше трансферот во ПСЖ во 2012 година за тогаш рекордни 42 милиони евра за дефанзивец. Во Париз стана столб на тимот, носеше капитенска лента и освои бројни трофеи, оставајќи свој печат како симбол на бразилска истрајност во Европа.
Челси и другите фудбалски битки
Кога сите мислеа дека неговите најдобри фудбалски години се зад него, Тијаго Силва повторно изненади – потпиша за Челси на 35 години. Многумина се сомневаа дали ќе го издржи ритамот на Премиер лигата. Но, тој ги замолчи сите.
Во 2021, го крена трофејот од Лигата на шампионите со Челси и уште еднаш докажа дека класата е вечна, а возраста – само бројка.
Симболот на сигурност во разиграната бразилска самба
Покрај блескавата клупска кариера, Тијаго Силва е и еден од столбовите на бразилската репрезентација во последната деценија и пол. За “селесао” има одиграно над 110 натпревари, настапувајќи на три Светски првенства и освојувајќи ги Купот на Конфедерации во 2013 година и Копа Америка во 2019 година.
Неговата смиреност, искуство и лидерство му донесоа статус на еден од најпочитуваните дефанзивци што Бразил ги имал во поновата историја, а дури и на 40 години, Силва покажува дека со вистинска посветеност и срце, може да се игра на највисоко ниво.
Од почеток до крај: Неговата сегашна трка по трофеи со Флуминенсе
Денес, на 40 години, Силва игра на Светското клупско првенство – натпреварување на кое ретко кој стигнува во негови години. И неговиот настап не е само симболичен. Тој сè уште настапува, сè уште го води тимот во одбраната и покажува дека борецот никогаш не се предава.
Со својот клуб од детството Флуминенсе, тој успеа да покаже истрајност и борба која ги одведе во четврфиналето, после победата над некогашниот ривал во Серија А лигата, екипата на Интер.
По победата “старото росонерско срце” се разбуди во Силва, а по елиминацијата на Интер тој изјави: “Цело време размислував за Милан, мислам дека навивачите на ‘ѓаволот’ ќе бидат среќни за овој резултат”.
Потоа, Силва се осврна и на самиот натпревар и пласманот на Флуминенсе во четвртфиналето:
“Задоволен сум од настапот. Не е лесно да се игра против Интер. Знаевме дека ќе биде тешко, но дефанзивно одигравме одличен меч. Не успеавме да играме со топка онака како што сме навикнати, затоа што тие многу притискаа, а и беше многу жешко. Но, задоволен сум. Ова е многу важен резултат за нас. Не беше лесно, тие пред само месец дена играа финале на Лигата на шампиони”.
“Не одигравме совршен натпревар, но вака мора да се игра против европски екипи – треба сите заедно да се бориме и браниме, затоа што тие се многу опасни. Но, во одбрана бевме одлични, и тие имаа проблеми, така што сме среќни за пласманот”.
Неговата кариера е многу повеќе од титули – тоа е приказна за непопустливост, за станување по секое паѓање, за инспирација за сите оние кои го гледаат како и по четири децении продолжува да им пркоси на годините, сезона по сезона.
Тијаго Силва – вечниот дефанзивец, приказна која одбива да биде завршена.
