Јужноафриканскиот фудбал и светската спортска јавност се затечени од огромна трагедија. Младиот репрезентативец Џејден Адамс почина на 25-годишна возраст, само неколку недели откако со својата селекција оствари историски пласман во нокаут-фазата на Светското првенство 2026.
Неговото тело било пронајдено во саботата наутро во куќа во предградие на Кејптаун. Локалната полиција веднаш отвори официјална истрага, но причините за смртта во моментов сè уште не се јавно потврдени.
Фудбалскиот свет во сочувство за прераното заминување
Адамс, кој настапуваше како играч од средниот ред за клубот Мамелоди Сандаунс, важеше за еден од најсветлите млади таленти во својата земја. Изминатиов месец, тој настапи на сите три натпревари од групната фаза на Мундијалот, каде Јужна Африка за првпат во историјата на машкиот фудбал ја помина групата. Својот последен натпревар го одигра во победата од 1-0 против Јужна Кореја.
За време на мундијалската кампања, Џејден Адамс доживеа тежок личен удар кога неговата баба Маријана почина само неколку часа пред натпреварот против Чешка (1-1). И покрај големата болка, младиот фудбалер тогаш излезе на теренот и професионално ги одработи своите обврски за националниот дрес.
Сочувство до семејството и соиграчите изрази и претседателот на ФИФА, Џани Инфантино, кој истакна дека младата ѕвезда на Мамелоди Сандаунс и националниот тим неизмерно ќе му недостасува на глобалното фудбалско семејство. Јужноафриканскиот министер за спорт, Гајтон Мекензи, упати апел до јавноста и медиумите да се воздржат од какви било претпоставки и да покажат сочувство кон неговите блиски во овие претешки моменти.
