Македонската репрезентација вечерва тренира на “Планет Груп Арена” во Гент, на само 24 часа пред големиот дуел против Белгија. Атмосферата во тимот е полна со фокус и верба, но сепак без преголеми зборови и јасна цел.
Еден од најискусните во црвено-жолтиот дрес, Александар Трајковски, повторно ја испрати пораката што совршено ја опишува оваа генерација: смиреност, реалност и вера во себе.
“Белгијците сега знаат против кого играат. Сметам дека ќе имаат поголем респект кон нас. Притисокот е на нив”, рече Трајковски. “Ние секој натпревар го играме исто, се подготвуваме на ист начин. Притисокот расте како што се ближи крајот на циклусот, но мора да го тргнеме на страна и да играме како што знаеме. Целта е јасна – да стигнеме до поволен резултат”.
Трајковски, кој веќе има искуство со решавачки голови во најтешки моменти, како оној во Палермо против Италија, добро знае што значи меч под притисок. Но, и тој верува дека Македонија има што да покаже и против ривал со квалитет и историја како Белгија.
“Мислам дека ова ќе биде добар натпревар и дека нема да им биде лесно ниту на нив”, додаде тој. “Како што доаѓа крајот на квалификациите, притисокот расте и за нив и за нас. Ова може да биде една од клучните средби во борбата за пласман. Белгија секогаш е силна, без разлика на генерацијата, но и ние знаеме што носиме во себе”.
Сцената е подготвена, а Гент ќе биде местото каде Македонија ќе се обиде уште еднаш да покаже дека не признава големи имиња, туку само голема желба.
