Секоја голема промена започнува со еден единствен чекор, а чест ни е што и оваа година сме медиумски партнер на најголемото спортско случување во Скопје. Одлуката да започнете со трчање, да си поставите нова спортска цел или едноставно да направите нешто добро за своето здравје може да биде почеток на патување кое целосно ќе ве трансформира. Токму ваква можност носи овогодинешното издание на Виз Ер Скопскиот маратон 2026, кој ќе се одржи на 4 октомври 2026 година, а пријавувањето е веќе во полн ек.
Со оглед на тоа што до големиот спортски ден остануваат уште неколку недели, сега е вистинскиот момент да ја започнете вашата подготовка. Учесниците имаат можност да изберат предизвик според својата физичка форма, искуство и лични амбиции – од рекреативната трка на 5 километри, преку полумаратонот и штафетниот маратон „ЕУ за спорт“, па сè до најголемиот испит на издржливоста на маратонската дистанца.
Важни датуми: Официјална маица и крајни рокови за регистрација
Организаторите истакнуваат еден посебно важен датум за сите кои сакаат да ја имаат официјалната маица во својот стартен пакет – 27 август.
Секој што ќе ја заврши својата пријава до овој датум, без разлика на избраната трка, автоматски добива официјална маица во стартниот пакет. По 27 август, маицата повеќе нема да биде дел од стартниот пакет, па затоа сите заинтересирани се повикуваат да не ја оставаат регистрацијата за последен момент.
Дополнително, 18 септември е последниот рок за пријавување по актуелните цени и воопшто за учество на овогодинешното издание. Навремената пријава носи и повеќе време за квалитетни подготовки, систематизиран тренинг и поставување реални цели за 4 октомври.
Силна меѓународна димензија: Тркачи од 52 земји пристигнуваат во Скопје
Виз Ер Скопскиот маратон и оваа година ја потврдува својата голема регионална и меѓународна репутација. Досега се пријавени учесници од дури 52 различни земји, со што Скопје повторно ќе биде глобална спортска сцена каде што преку трчањето ќе се спојат различни култури и спортски заедници.
Покрај најбројните домашни натпреварувачи, најголем бран пријавени досега пристигнува од Србија, Германија, Велика Британија, Шпанија, Италија, Франција, Унгарија, Турција и Холандија.
„Трчањето ќе те промени“ – Предизвик за секого
Под мотото „Трчањето ќе те промени“ (“Running Will Change You”), организаторите ја истакнуваат трансформативната моќ на овој спорт. Вредноста на маратонот не се мери само во претрчаните километри – за некого победа е да ја истрча својата прва рекреативна трка, за друг да совлада полумаратон, а за трет да постави нов личен рекорд за кој тренирал со месеци.
Секој истрчан километар гради нова самодоверба, дисциплина и издржливост. На тој пат, целта не е само да се стигне до финишот, туку да се стигне како подобра и посилна верзија од себе.
