Сплит се потсети на својот најсветол датум: Пред 37 години започна доминацијата на најдобрата европска кошаркарска генерација на сите времиња.
Во срцето на Баварија, на 6 април 1989 година, кошаркарскиот свет доби нов владетел. Сплитска Југопластика, во епското финале во Минхен, го совлада моќниот Макаби од Тел Авив со 75:69. Тоа беше почетокот на незапирливото „жолтило“ кое три години по ред ја покоруваше Европа, успех кој подоцна му ја донесе на клубот титулата „Најдобра кошаркарска екипа на 20. век“.
Сплит на нозе: 150 илјади луѓе во делириум
Додека во Минхен се креваше шампионскиот пехар, на улиците на Сплит се случуваше историја. Над 150 илјади навивачи го прославија првиот од трите последователни наслови, претворајќи го градот во море од жолти бои.
Од клубот денес порачуваат:
„Никогаш нема да престанеме да потсетуваме на првиот од трите најголеми датуми во нашата историја. Тоа беше почетокот на најубавата спортска трилогија, која продолжи во 1990 и 1991 година.“
Визијата на Божо Маљковиќ
Приказната за овој успех започнува три години претходно со доаѓањето на Божо Маљковиќ. Тогаш релативно непознатиот стратег препознал небрусен дијамант во генерацијата предводена од Тони Кукоч и Дино Раѓа. Со челична дисциплина, фокус на физичката подготвеност и фанатична игра во одбраната, Маљковиќ ги трансформира талентираните момчиња во европски шампиони
Хероите од Минхен (6 април 1989)
Во финалето кое ги постави темелите на европската кошарка, најефикасни беа:
- Дино Раѓа – 22 поени
- Тони Кукоч – 18 поени
- Душко Ивановиќ – 12 поени
- Зоран Сретеновиќ и Горан Собин – по 9 поени
- Лука Павиќевиќ (2), Жан Табак (2) и Велимир Перасовиќ (1).
Овој триумф беше само првиот чин од нестварната серија победи која својот епилог го доби на 19 април 1990 и 18 април 1991 година, кога Сплит ја запечати својата апсолутна доминација на стариот континент.
Гостинска статија на Марија Петровска
