Она што започна како темелна ревизија во куќата на фудбалот, утрово кулминираше со полициска акција. Поранешниот претседател на Фудбалската федерација на Македонија (ФФМ), Муамед Сејдини, е лишен од слобода во заедничка акција на МВР и Јавното обвинителство Скопје.
Сејдини се сомничи за сериозни кривични дела – проневера и злоупотреба на службената положба и овластувања, со кои на федерацијата и е нанесена штета од околу 700.000 евра.
Парите од УЕФА завршиле во „аванс“ без гаранција
Како што претходно пишуваше SportStation.mk, „Пандорината кутија“ се отвори по доаѓањето на новото раководство, кое ги откри малверзациите поврзани со изградбата на трибината на стадионот „Билјанини Извори“ во Охрид.
Истрагата покажа дека Сејдини, надвор од сите процедури и без одлука на Управниот одбор, самоволно потпишал документ со кој одобрил авансна исплата од 20% кон фирмата изведувач. Овие средства, доделени од УЕФА за развој на инфраструктурата, биле префрлени без банкарска гаранција, со што федерацијата била доведена во ризик и директна материјална штета.
Од дисциплинска казна до лисици на рацете
Потсетуваме дека во февруари годинава, на Сејдини веќе му беше изречена дисциплинска мерка – забрана за вршење на каква било функција во фудбалот во траење од две години. Дисциплинската комисија тогаш утврди дека тој свесно ги измамил членовите на Управниот одбор, менувајќи ги условите на веќе прифатениот договор за трибината во Охрид.
Сепак, денешното апсење покажува дека случајот излегува од рамките на фудбалските статути и добива сериозна кривична завршница. Полициски службеници од Одделот за сузбивање на организиран и сериозен криминал веќе го приведоа поранешниот прв човек на фудбалот, а истрагата продолжува за да се утврди каде точно завршиле парите наменети за македонскиот спорт.
Овој скандал фрла голема сенка врз неговиот мандат, кој иако беше пропратен со историски успеси на репрезентацијата, сега е под лупа поради сомнежи за длабока корупција и самоволие.
