Откако претходно објавивме за казната која УЕФА му ја изрече на македонскиот шампион Вардар, Европската куќа на фудбалот го објави комплетниот извештај од Првата комора на Телото за финансиска контрола на клубовите (CFCB) за сезоната 2025/26. Финансискиот фер-плеј и новите правила за финансиска одржливост зедоа сериозен данок ширум Европа, а санкционирани се вкупно 14 клубови, меѓу кои и некои од најголемите европски гиганти.
Јувентус и Њукасл со најголеми проблеми кај правилото за „фудбалска заработка“
Правилото за фудбалска заработка, кое за првпат се оценуваше врз основа на тригодишен агрегат (2023, 2024 и 2025 година), им донесе сериозни главоболки на неколку клубови.
Италијанскиот гигант Јувентус и англискиот премиерлигаш Њукасл Јунајтед мораа да потпишат тригодишни договори за порамнување (settlement agreements). Јувентус доби вкупна казна од 20 милиони евра (од кои 14 милиони се условни), додека Њукасл е казнет со 10 милиони евра (7 милиони условно). Двата клуба добија и ограничувања за регистрација на нови играчи на А-листата за европските натпреварувања.
За истиот прекршок, но од привремен карактер, казнети се француска Ница (2 милиони евра) и португалска Санта Клара (1 милион евра). Помали прекршувања беа забележани кај српски Партизан (казнет со 200.000 евра) и казахстанска Астана (100.000 евра).
Астон Вила и Стразбур драстично го прекршиле правилото за „трошоци на тимот“
Вториот сегмент од финансиската контрола се однесуваше на правилото за трошоци на тимот, каде клубовите не смеат да пријават сооднос на трошоци за плати и трансфери поголем од 70% во календарската 2025 година.
Тука УЕФА беше немилосрдна кон прекршителите. Највисоки казни добија францускиот Стразбур со дури 25 милиони евра (12 милиони условно) и англискиот хит Астон Вила со неверојатни 22,5 милиони евра (15 милиони условно). Поради сериозноста на прекршокот, овие два клуба добиваат и рестрикции за регистрација на играчи за сезоната 2026/27.
На листата казнети за надминување на трошоците од 70% се најдоа и:
- Фенербахче – 7 милиони евра
- Фиорентина – 6 милиони евра
- Челзи – 3 милиони евра (Челзи и Астон Вила беа санкционирани и минатата сезона)
- Њукасл – дополнителни 3 милиони евра (покрај првата казна)
- Нотингем Форест – 2,5 милиони евра
- АЕК Атина – 500.000 евра
- Ница – 450.000 евра
Интересно е што италијанските Болоња и Наполи исто така ја надминале границата од 70%, но УЕФА ги ослободи од казна бидејќи нивното отстапување било целосно ублажено преку големиот суфицит на фудбалска заработка остварен во претходниот период.
Јасно е дека УЕФА воспоставува строга дисциплина и дури и најбогатите клубови повеќе не можат да ги заобиколуваат правилата без да се соочат со драконски финансиски и спортски санкции.
