Конечно радост за актуелниот шампион! По очајниот старт на сезоната и трите врзани порази во сите натпреварувања, фудбалерите на Вардар одиграа шампионски и со убедливи 4-1 го совладаа незгодниот состав на Силекс на Националната Арена „Тодор Проески“. Во другиот натпревар, Шкендија ја продолжи победничката серија откако во драматичен меч го сруши шампионот Струга Трим Лум со 2-1.
Ефикасен Вардар за прекин на кризата
Избраниците на Матија Мирков и Христијан Кировски одиграа инспириран натпревар и покажаа карактер кога беше најпотребно. „Црвено-црните“ поведоа уште во 3. минута по одличниот продор на Спахиу и реализацијата на Димитар Данев.
Гостите од Кратово имаа свои моменти и успеаја да израмнат во 37. минута преку Анѓелески, кој со прекрасен шут го матираше Талески. Сепак, Вардар имаше целосна контрола во второто полувреме. Стратегијата на Мирков вроди со плод откако резервистите Михаил Маневски (63′) и Мигел Пиреш (69′) донесоа сигурно водство од 3-1. Точка на одличното издание стави Едиз Спахиу во 89. минута, кој круниса одлична партија по претходно погодената греда.
Овој триумф носи огромно олеснување за вардарци и го симнува притисокот по лошиот почеток на кампањата.
Дербито во Скопје во знакот на ВАР и пеналите
На теренот при ФФМ во Скопје, Шкендија стигна до четвртата победа по ред, задржувајќи го максималниот учинок во првенството. „Црвено-црните“ ја победија Струга Трим Лум со 2-1 во натпревар во кој технологијата и казнените удари го имаа главниот збор.
Тетовци поведоа во 29. минута преку Нзенгуе по асистенција на Зејнулаи. Во 55. минута, по прегледување на ВАР снимката (OFR), судијата Стојанче Трпчевски досуди пенал за Струга поради прекршок (газење) од Адурахмани врз Шабани, кој успешно го реализираше Малески.
Решавачкиот момент се случи во 84. минута. Арби Воша задоцни со стартот и го собори Нзенгуе во казнениот простор, а главниот судија без двоумење (одлука потврдена од ВАР) покажа на белата точка. Искусниот Бесарт Ибраими беше сигурен егзекутор за конечни 2-1 и голема радост на Шкендија.
