Тоа требаше да биде вечер за паметење, а се претвори во вистински фудбалски кошмар. Македонскиот шампион Вардар ги заврши настапите во евро-куповите на најболен можен начин, откако во реванш натпреварот од второто квалификациско коло за Конференциската лига доживеа дебакл во продолженијата против Рига (5-2).
Иако „црвено-црните“ имаа неверојатно водство од 0-2 сè до 87-та минута и покрај тоа што цел натпревар играа со фудбалер помалку, недостатокот на енергија и концентрација во самиот финиш скапо ги чинеше.
Спектакуларен волеј и шок кој ја промени насоката на мечот
Средбата започна со огромна енергија. Голманот Давор Талески беше на висина на задачата спречувајќи неколку опасни обиди на домаќините, што им даде крилја на вардарци. Во 17-та минута следеше вистинска магија – Иан Пулејо одлично нафрли, а Давид Бабунски со спектакуларен волеј удар со левата нога ја заби топката во мрежата за 0-1.
Радоста, сепак, траеше кратко. Само две минути подоцна, по една кардинална грешка во средниот ред, Бадамоси излезе сам пред голот, а Филип Најдовски како последен играч во одбраната беше принуден да го сруши. Судијата Кикачешвили веднаш покажа директен црвен картон, принудувајќи го тренерот Кристијан Фабијани да го внесе Дарко Велковски на местото на Пирес.
Херојство на Талески и Омерагиќ за надеж, па студен туш во финишот
Со играч повеќе, Рига изврши вистинска опсада на голот на Вардар. Сепак, Талески блескаше меѓу стативите. Во 66-тата минута, кога притисокот беше најголем, Вардар дочека шанса преку контра-напад. Герсон Родригеш одлично повлече по левата страна, неговиот удар беше одбранет, но на вистинското место се најде Азер Омерагиќ кој од втор обид зголеми на 0-2.
Изгледаше дека македонскиот првак е на чекор до епска сензација и пласман понатаму (надоместувајќи ја негативата од 2-3 од првиот меч во Скопје). Но, силите ги напуштија фудбалерите на Вардар. Во 87-та минута, Таиво успеа да ја смести топката во мрежата по една мешаница, израмнувајќи го вкупниот резултат и носејќи го натпреварот во продолженија.
87’ VĀĀĀRTI!🔥🔥🔥 Abdulrahmans Taivo izlīdzina rezultātu summā – 1:2, 4:4!✊⚽️ pic.twitter.com/a12UmMTM3v
— Riga FC (@RigaFC_Official) July 28, 2026
Целосен колапс во екстра-времето
Она што се случи во продолженијата беше класичен распад на системот кај уморните вардарци. Уште во втората минута од екстра-времето, Раки Ауани израмни на 2-2, казнувајќи ја лошата реакција на одбраната.
90+2’ VĀĀĀRTI!🔥🔥🔥 Raki Aouani iesit un esam priekšā divu spēļu summā!✊⚽️ pic.twitter.com/bKj0tvyaHJ
— Riga FC (@RigaFC_Official) July 28, 2026
Пред крајот на првото продолжение, Јаго Сигуеира со одмерен удар донесе целосен пресврт за домаќините (3-2). Ова предизвика голема нервоза, по што и тренерот Фабијани заработи исклучување. Во второто продолжение, Региналдо (109′) и Фереира (117′) само ја потврдија убедливата победа на летонскиот шампион за конечни 5-2 и вкупен резултат од 8-4.
