На Арената „Тодор Проески“ денеска со почеток од 13:00 часот Вардар го пречекува Тиквеш во рамки на 13-то коло од Првата македонска фудбалска лига. Дуел со различни амбиции, но со иста цел – бодови што многу значат и за едните и за другите.
Вардар влегува во натпреварот како лидер и во одлична форма, со активна серија без пораз и свежа победа над Пелистер во Битола. Тимот на Александар Таневски има јасна цел, триумф и задржување на првото место пред репрезентативната пауза.
„Нашата серија на мечеви без пораз е сè уште активна и така треба и да остане. Вардар нема пораз и според мене така и ќе остане. Целта е јасна, а тоа е победа на секој меч и задржување на лидерската позиција. Тоа е Вардар. Имам респект за Тиквеш, тоа е клуб каде што играв пред да дојдам тука, но денеска на Арената одиме само на победа“, изјави Михаил Маневски пред дуелот.
Од друга страна, Тиквеш пристигнува во Скопје со доза на оптимизам. По слабата прва половина на сезоната, под водство на новиот тренер Борче Христов тимот конечно покажа знаци на оживување и освои четири бода на последните два натпревари.
„Секако дека играњето на Арената и дуелот против Вардар е дополнителен мотив за секого. Добро стартувавме со новиот тренер и сакаме да ја продолжиме позитивната серија. Имаме респект кон Вардар, но и свои амбиции и мотиви“, изјави Александар Мишов.
Дуелот на Арената „Тодор Проески“ стартува во 13:00 часот, а Вардар ќе се обиде со нова победа да ја потврди лидерската позиција и да ја продолжи својата непобедлива низа, додека Тиквеш ќе бара изненадување и нова потврда дека кризата конечно е зад нив.
