Новата година донесе нова ѕвезда на американскиот колеџ паркет. Во драматична завршница во „Coastal Athletic Association“ (CAA), македонскиот кошаркарски бисер Андреј Шошкиќ одиграл натпревар за паметење и го водел својот тим Стоуни Брук до тесна победа од 81-80 против Норт Каролина А&Т.
Starting off the new year with a dub 🎉 pic.twitter.com/zUBdk4p9gN
— Stony Brook Men’s Basketball (@StonyBrookMBB) January 3, 2026
Ова беше убедливо најдобрата партија во младата кариера на Шошкиќ „преку барата“, во која постави нови лични рекорди со 27 поени и 6 асистенции.
Скоро безгрешен: Шутирал како во транс
Во најголемиот дел од натпреварот во „Ајланд Федерал Арената“, Шошкиќ бил нерешлива енигма за противникот. Тој го започна мечот со неверојатни 9 од 9 од поле, вклучувајќи и 5 од 5 за три поени и 4 од 4 од линијата за слободни фрлања.
Првото и единствено промашување го имал дури на 1:12 минути пред крајот на натпреварот, завршувајќи ја својата „рапсодија“ со речиси совршен процент на реализација.
Лидер во клучните моменти
Додека сениорот Ерик Прат помогнал со 23 поени, бруцошот Шошкиќ бил тој што ја презел одговорноста кога се кршел резултатот. Откако гостите се вратиле од -15 и израмниле на 69-69, Македонецот реагирал целосно ладнокрвно. Прво му асистирал на Прат за тројка, а потоа самиот потентирал со влез за водство од 74-69.
Во периодот од 16-тата минута до 3:30 пред крајот, Шошкиќ и Прат ги постигнале сите 16 поени за Стоуни Брук, докажувајќи дека младиот македонски плејмејкер веќе е подготвен за големи дела.
Со оваа победа, Стоуни Брук сега има скор од 9-7, а Шошкиќ се наметнува како еден од главните офанзивни адути на тимот.
Статистика на Андреј Шошкиќ vs. N.C. A&T:
- Минути: 34
- Поени: 27 (Рекорд на кариера)
- Асистенции: 6 (Рекорд на кариера)
- Тројки: 5/6 (Почна 5/5)
- Шут од поле: 9/10 (Почна 9/9)
