По неколку дебакли кои ја затресоа самодовербата на „Енфилд“, Ливерпул конечно покажа знаци на живот. Избраниците на Арне Слот славеа со 2-0 против Фулам, ставајќи крај на мизерната серија резултати и што е најважно, враќајќи се на позициите кои водат во Лигата на шампионите.
Оваа победа дојде во вистински момент, само неколку дена пред реваншот од четвртфиналето во ЛШ против ПСЖ, каде Ливерпул ќе брка негатива од два гола.
Слот со пет измени, Салах се врати со гол
Под голем притисок по дебаклот од Манчестер Сити во ФА Купот и бледото издание во Париз, Арне Слот одлучи да го промеша тимот. Направи дури пет измени, а во првиот тим се вратија младиот Рио Нгумоха и суперѕвездата Мохамед Салах, кој неочекувано беше на клупата против ПСЖ.
Токму тие двајца беа творци на триумфот. Во интервал од само четири минути во првото полувреме, двајцата постигнаа речиси идентични голови со прецизни „фелширани“ удари, носејќи му го на Ливерпул посакуваниот мир. Со оваа победа „црвените“ се искачија на петтото место, кое според новите правила гарантира настап во елитата следната сезона.
Сепак, атмосферата не беше целосно славеничка. Навивачите на Ливерпул пред и за време на мечот протестираа против сопствениците од „ФСГ“ поради најавеното поскапување на билетите, испраќајќи јасна порака до управата.
Драма на „Гтеч“: Дјусбери-Хол го спаси Евертон во 90+
Највозбудливиот меч викендов се одигра во Лондон, каде Брентфорд и Евертон ги поделија бодовите во ремито 2-2. Натпреварот беше полн со пресврти, а се играше под силен дожд кој дополнително ја зачини драмата.
Игор Тијаго ги доведе „пчелите“ во водство од пенал, но Бето со глава израмни за Евертон. Тијаго повторно стапи на сцена во второто полувреме, постигнувајќи го својот 21. гол во сезоната за 2-1. Сепак, кога изгледаше дека бодовите остануваат во Лондон, Кирнан Дјусбери-Хол со прецизен низок удар во судиското продолжение донесе златен бод за „карамелите“. Двата тима сега имаат по 47 бодови во борбата за европските места.
Брајтон со европски соништа, Барнли со една нога во Чемпионшип
Брајтон ја продолжи победничката низа и со 2-0 на гости кај Барнли се доближи на само два бода до Челси. Херој на „галебите“ беше Матс Вифер, кој го прекина својот голгетерски пост долг 16 месеци постигнувајќи два гола.
За тимот на Скот Паркер, ова беше уште едно фрустрирачко попладне. Барнли сега заостанува дури 12 бодови зад зоната за опстанок на само шест кола до крајот, што значи дека нивното испаѓање е речиси извесно.
