Во последниот натпревар од 17. коло во Првата македонска фудбалска лига, Пелистер на стадионот „Петар Милошевски“ буквално го „прегази“ тимот на Работнички со убедливи 4-1. Натпреварот го одбележа неверојатната партија на црногорскиот интернационалец Лука Булатовиќ, кој со три гола покажа зошто е еден од најдобрите играчи за врска во лигата.
Шоуто на Булатовиќ почна по само 15 минути
Домаќините тргнаа агресивно уште од првата минута, а резултатот беше отворен во 16. минута. Ристовски испрати перфектен центаршут од десната страна, а Лука Булатовиќ одлично реагираше за почетна радост на „Чкембарите“. Битолчани не застанаа тука – само девет минути подоцна Јован Попзлатанов мораше да интервенира од самата гол-линија за да спречи дебакл уште во раната фаза.
Евро-гол и одговор од пенал
Во 33. минута, Булатовиќ повторно стапи на сцена. Неговиот обид за нафрлање од десната страна се претвори во спектакуларен лоб-удар кој заврши директно во мрежата на немоќниот Фабрис Ондоа. Иако Работнички успеа да се врати во игра преку Бесир Демири, кој беше прецизен од белата точка во 37. минута по фаулот над Бошнаков, тоа беше сè што „романтичарите“ успеаја да направат денес.
Волеј за хет-трик и точка од Керим
Веднаш по паузата, во 48. минута, Милан Србијанац ја „нацрта“ топката на волеј за Лука Булатовиќ, кој со хируршка прецизност го комплетираше својот хет-трик за 3-1. До крајот, иако Работнички се закануваше преку Џејсон Езеб, а Пелистер остана со играч помалку по црвениот картон на Филип Петровиќ (по ВАР интервенција во 83. минута), казната за промашувањата стигна во судиското надополнување. Вилдан Керим ги постави конечните 4-1, потврдувајќи ја моќта на „зелено-белите“.
