Неделното попладне во англиската елита донесе неверојатни резултати и пресврти кои директно влијаат на битката за Лигата на шампионите, но и на борбата за опстанок. Астон Вила преживеа вистински драматичен натпревар против Сандерленд, додека Нотингем Форест со фуриозно второ полувреме го фрли Барнли во амбис.
Астон Вила – Сандерленд 4:3: Драма во 58 секунди и спас во 93-та минута
На „Вила Парк“ бевме сведоци на еден од највозбудливите натпревари сезонава. Тимот на Унаи Емери беше на чекор да прокоцка сигурни три бода, но резервистот Тами Ејбрахам се погрижи сонот за Лигата на шампионите да остане жив.
Натпреварот започна идеално за домаќините. Оли Воткинс со два гола со глава во првото полувреме и асистенција за Морган Роџерс на почетокот на вториот дел, донесе убедливо водство од 3:1 (за Сандерленд во меѓувреме погоди младиот Риг). Кога сите мислеа дека Вила рутински ќе го приведе мечот до крај, на сцена стапија грешките на Џејдон Санчо.
За само 58 секунди во финишот на мечот (86′ и 87′), Сандерленд ги казни киксовите на Санчо и преку Траи Хјум и Вилсон Исидор израмни на 3:3. Гостите дури имаа и „зицер“ за победа преку Диара, но Емилијано Мартинез со велелепна одбрана го спаси својот тим. Казната стигна во 93-та минута кога Лука Дињ центрираше, а Ејбрахам со доза на среќа ја смести топката во мрежата за конечни 4:3.
Со оваа победа, Вила сега има огромни 10 бода предност пред шесттиот Челси на само пет кола до крајот.
Нотингем Форест – Барнли 4:1: Шоу на Гибс-Вајт за опстанок и очај кај гостите
Нотингем Форест направи голем чекор кон опстанокот, додека Барнли со овој пораз практично ги спакува куферите за Чемпионшип. Иако гостите водеа на полувреме со голот на Зиан Флеминг, вторите 45 минути поминаа во знакот на еден човек – Морган Гибс-Вајт.
Англискиот репрезентативец го постигна својот прв хет-трик во кариерата, погодувајќи во 62-та, 69-та и 77-та минута за целосен пресврт. Точка на натпреварот стави Игор Жезус во судиското продолжение за конечни 4:1.
Оваа победа на „шумарите“ значи дека Барнли сега заостанува дури 12 бода зад зоната за опстанок на пет кола до крајот. Доколку Вест Хем го победи Кристал Палас во понеделник, а Барнли не го совлада Манчестер Сити во среда, нивното испаѓање ќе биде и математички потврдено. Овој резултат дополнително го зголеми притисокот и врз Тотенхем, кој сега е во зоната за испаѓање (18-то место).
