Во вечер полна со возбуди, пресврти и велемајсторски погодоци, Лацио и Удинезе ги поделија бодовите играјќи нерешено 3-3. Иако на трибините на „Олимпико“ сè уште се чувствуваше празнината поради бојкотот на најверните навивачи, оние кои беа присутни сведочеа на вистинска фудбалска битка која се реши буквално во последните секунди.
Ротациите на Сари и враќањето на надежта
Маурицио Сари мораше да прави многу калкулации со составот, особено по епското полуфинале во Купот на Италија против Аталанта минатата недела. Истрошени од 120-те минути борба во Бергамо, „небесно-сините“ влегоа во овој дуел со неколку измени, но и со една добра вест – враќањето на Николо Ровела на клупата по два месеци пауза поради скршената клучна коска.
Натпреварот започна со шок за домаќините кога Кингсли Ехизибуе со проектил од „невозможен“ агол донесе водство за Удинезе. Сепак, Лацио брзо се созеде, а Лука Пелегрини со филигрански прецизен волеј од работ на шеснаесеттникот го израмни резултатот, најавувајќи дека ова ќе биде ноќ за паметење.
Педро потсети на својата класа, Ата го шокираше Рим
Искусниот Педро во вториот дел со карактеристичен „фелш“ удар донесе пресврт и водство за Лацио, но Удинезе покажа зошто е една од најопасните екипи кога игра од контранапад. Младиот Артур Ата стана херој за гостите, прво израмнувајќи на 2-2, а потоа во 86-та минута донесе нов шок за Римјаните со својот втор погодок по една мешаница во петерецот.
Малдини во последната минута за спас на бодот
Кога веќе се чинеше дека Удинезе ќе ги однесе сите три бода, на сцена стапи Даниел Малдини. Во 90-тата минута, по една нафрлена топка од Педро, Малдини мајсторски ја избегна офсајд-замката и ја смести топката во мрежата за конечни 3-3.
Ова реми веројатно ги оддалечува двата тима од битката за Европа во Серија А, но за Лацио овој бод е важен за одржување на моралот пред најважниот натпревар во сезоната – финалето на Купот против Интер закажано за 13 мај.
