Манчестер Сити уште се збогува со својот менаџер Пеп Гвардиола, човекот кој ја трансформираше историјата на клубот. По официјалната најава дека Каталонецот го напушта „Етихад“ по цели 10 години, англискиот гигант објави моќно и емотивно видео кое ги расплака навивачите ширум светот, проследено со култната песна „Stop Crying Your Heart Out“ од Оазис.
Низ компилација од најубавите моменти, освоените трофеи, тешките битки и незаборавните славја, моќната нарација во видеото испраќа порака на вечна благодарност кон архитектот на сината доминација:
„10 години се цел живот во фудбалот. И каков само живот беше тоа. Подигнувавме трофеи, испишувавме историја и ги видовме нашите најлуди соништа како се остваруваат. Доминиравме дома, ја освоивме Европа и светот. Ние ти ги дадовме нашите надежи, а ти ни даде сè за возврат. Заедно копавме и стискавме заби низ дождот. Знаејќи дека сонцето повторно ќе изгрее. И навистина сјаеше Пеп, многу, многу силно.
Видовме работи што тие никогаш нема да ги видат. Ти го направи тоа возможно. Го направи нашиот град твој дом. Ја промени играта и сите наши животи со неа. Твоето наследство ќе живее вечно. Ти беше со нас на секој чекор од патот, Пеп. И ние бевме со тебе, исто така“.
Пораките на Халанд и Силва: „Фудбалски татко“ кој направи невозможното да изгледа нормално
Покрај клупското видео, емоциите ги споделија и играчите кои под негово водство испишаа историја, а особено се истакнаа прошталните пораки на Ерлинг Халанд и Бернардо Силва. Најдобриот стрелец на тимот преку своите социјални мрежи му оддаде посебна почит на својот ментор:
„Менаџер кој никогаш не престана да ме учи. Звучи лудо да се каже ова, но ти направи големината да изгледа како нешто сосема нормално. Дури и по хет-трикови, победи и трофеи, секогаш имаше нова лекција, нов предизвик и ново ниво за достигнување. Тој менталитет го промени клубот засекогаш, а ме промени и мене. Чест на животот е да се работи со најдобриот“, напиша норвешкиот напаѓач.
Срцето и душата на овој тим на Сити, Португалецот Бернардо Силва, кој е играчот со најмногу настапи под водство на Пеп на „Етихад“ и заминува од клубот заедно со него, испрати исклучително лична и емотивна порака:
„Уште пред да дојдам во клубот, Пеп веќе беше инспирација за мене. Да станам негов играч и по 9 години да бидам оној со најмногу одиграни натпревари под негово водство е вистинска чест. Тој пристигна во Манчестер Сити, а се зборуваше дека Премиер лигата не може да се доминира играјќи на неговиот начин… Па, не беа во право. Не само што доминираше, тој ја промени играта во Англија како што го направи тоа и во други земји претходно.
Гладот и амбицијата да сака сè повеќе и повеќе дури и откако победуваше повторно и повторно беа голема инспирација. За мене лично, тој беше и секогаш ќе биде мојот фудбалски татко. Многу од работите кои менаџерите во минатото ги сметаа за слабости во мојата игра, тој ги виде како предности и ме разбра од првиот ден. На лично ниво, љубезноста, довербата и почитта што ја имавме еден кон друг ме прават најгорд и тоа оди многу подалеку од фудбалот. Не можам да бидам поблагодарен за она што го направи за мене и моето семејство. Ти благодарам за сите спомени и искуства на најголемиот менаџер на сите времиња, Пеп Гвардиола!“
Заминувањето на Пеп Гвардиола означува крај на една епохална ера. Човекот кој донесе 20 големи трофеи заминува како апсолутна легенда на Манчестер Сити, оставајќи зад себе фудбалско наследство кое тешко дека некогаш ќе биде надминато.
