Македонскиот фудбалски прволигаш Шкендија официјално го промовираше своето најново и звучно засилување за претстојната сезона. Станува збор за едно од најатрактивните имиња на косовскиот пазар, крилниот напаѓач Алмир Криезиу.
Откако ги помина деталните медицински прегледи во Тетово, 27-годишниот фудбалер потпиша двегодишен договор со „црвено-црните“, а веднаш потоа замина за Словенија каде што ќе му се приклучи на тимот во главната подготвителна фаза.
Шкендија ја доби битката со странските клубови
Зад себе Криезиу има фантастичен период со екипата на Балкани од Сухарека, каде што успеа да ги освои титулата во косовскиот шампионат и националниот Куп, а исто така забележа и настапи во групната фаза од УЕФА Конференциската лига. Неговата пазарна вредност според специјализираниот портал „Трансфермаркт“ изнесува одлични 750.000 евра, што го прави едно од највредните засилувања во ПМФЛ.
За неговите услуги имаше сериозен интерес и конкретни понуди од клубови надвор од Балканскиот полуостров, но тој реши да го прифати проектот на тетовскиот клуб.
„За почеток, многу сум задоволен. Како што знаеме, Шкендија е голем клуб со богата историја. Беше лесно да се донесе одлуката и да се прифати оваа понуда. Се надевам дека ќе го дадам максимумот на секој натпревар и тренинг за да им донесам радост на френетичните навивачи и на ‘Балистите’“, истакна Криезиу во своето прво интервју за клупската телевизија.
Квалитет плус за офанзивата на тетовци
Во својата професионална кариера, Алмир Криезиу има одиграно 212 официјални натпревари, постигнувајќи 37 голови и 37 асистенции. Неговата примарна и најсилна позиција е како лево крило, но со својата поливалентност и брзина честопати успешно одговара и на десната крилна позиција во нападот.
Раководството и стручниот штаб на Шкендија од него очекуваат да донесе дополнителна експлозивност, креација и офанзивна моќ во остварувањето на главните зацртани цели, враќање на шампионскиот трон во Македонија и успешен излез во Европа.
