Денешното коло во домашниот шампионат донесе целосна доминација на Шкендија во тетовското дерби, но и голем шок за актуелниот шампион Струга Трим Лум, кој со поразот од Тиквеш направи сериозен чекор назад во битката за излез во Европа.
Тиквеш ја освои Струга: Кавадарчани слават, шампионот во агонија
Струга Трим Лум 1-2 Тиквеш Додека во Тетово паѓаа голови, во Струга се случи најголемото изненадување. Иако домашните поведоа преку Марјан Радески во 21-вата минута, радоста на стружани траеше само пет минути. Поранешниот играч на домашните, Бесир Радамани, израмни на 1-1, а од почит кон својот поранешен клуб одлучи да не го прослави погодокот.
Клучниот момент се случи во 56-тата минута кога Сила украде топка на средината на теренот, претрча половина игралиште и во стил на голем стрелец погоди за 1-2. До крајот, Струга безуспешно напаѓаше, а натпреварот го одбележа и страотната повреда на Папе Фал, кој со возило на брза помош беше пренесен во болница. За Тиквеш ова беше 12-та победа сезонава, со која се зацврсти на петтото место, додека Струга сега заостанува дури осум бода зад второпласираната Шкендија.
Шкендија брутална против Шкупи: „Петарда“ и историски триумф во Тетово
Шкендија 6-0 Шкупи Тетовските „црвено-црни“ одиграа натпревар за учебници, испраќајќи дури шест гола во мрежата на тимот од Чаир. Херој на денот беше Мелиќи, кој со два гола со глава во раната фаза на мечот го скрши отпорот на гостите, а можеше да стигне и до хет-трик доколку беше попрецизен во 25-тата минута.
Легендарниот Бесарт Ибраими уште еднаш покажа зошто е страв и трепет во ПМФЛ, постигнувајќи два гола (еден со проектил од 17 метри), додека финишот на мечот му припадна на Лиридон Латифи, кој исто така двапати се запиша во листата на стрелци за конечни и неверојатни 6-0. Со оваа победа Шкендија ја зацврсти втората позиција и останува во трка за највисок пласман.
