Србија останува во игра за главната рунда на Европското првенство 2026! Во драматичен натпревар пред повеќе од 9.000 гледачи во Хернинг, избраниците на Раул Гонзалес славеа голема победа над фаворизираната Германија со 30-27, иако на полувреме имаа негатива од четири гола (13-17).
Ова е прва официјална победа на Србија над двократниот европски шампион, а дојде благодарение на фантастичното второ полувреме во кое „орлите“ покажаа неверојатен карактер и тактичка зрелост.
„Ел Команданте“ повторно ги измеша картите
Уште по првиот натпревар против Шпанија, SportStation.mk анализираше дека Србија под водство на Раул Гонзалес е сериозен тим кој ќе биде „тврд орев“ за секого. Вечерва тоа се потврди на најдобар можен начин.
Пресврт за аналите: Од -4 до триумф
Германија го контролираше првиот дел, но Србија излезе како „препородена“ по одморот. Со поцврста одбрана и побрза транзиција, тие брзо ја стопија предноста на противникот. Клучниот момент се случи во финишот, кога при резултат 26-26, Србија ја презеде контролата и со серија голови го реши победникот, оставајќи ги Германците во шок.
Хероите на вечерта: Додиќ и Милосављев
- Дејан Милосављев беше „ѕид“ на голот со 12 одбрани (од кои многу во клучни моменти), целосно надминувајќи ги германските колеги Шпат и Волф.
- Младиот Стефан Додиќ беше прогласен за играч на натпреварот (MVP) со перфектни 4/4 и 5 асистенции, диригирајќи ја играта на Србија со неверојатна смиреност.
- Најефикасни беа Урош Којадиновиќ и Вукашин Воркапиќ со по 6 гола.
Со оваа победа, групата А стана вистински „пекол“. Шпанија е прва со 4 бода, додека Србија и Германија имаат по 2. Последните натпревари ќе одлучуваат кој патува понатаму.
