Фудбалската репрезентација на Србија, само три дена по болниот пораз од Албанија и оставката на селекторот Драган Стојковиќ – Пикси, успеа да стигне до тешка, но важна победа од 1:3 на гостувањето кај Андора.
Иако на крајот резултатот е убедлив, натпреварот беше сè само не лесен. Србија се мачеше, прими шокантен гол од половина терен, но на крајот, квалитетот на тандемот Влаховиќ – Митровиќ дојде до израз и ги спаси “орлите” од нова бламажа.
Шок во Андора: Гол од центар и автогол за 1:1 на полувреме
Натпреварот започна кошмарно за Србија. Во 17-та минута, по една загубена топка на средината на теренот, Гијом Лопез го виде голманот Петровиќ излезен далеку од својот гол и со неверојатен удар од речиси половина терен донесе водство за Андора.
Сепак, радоста на домаќините траеше само две минути. По еден корнер, дефанзивецот Кристијан Гарсија несреќно си постигна автогол за израмнување на 1:1, резултат со кој се замина на полувреме.
Конекцијата од Јувентус и рекордот на Митровиќ
Во второто полувреме, привремениот селектор Зоран Мирковиќ успеа да го разбуди својот тим. Во 54-тата минута, проработе конекцијата од Јувентус, Филип Костиќ одлично центрираше, а Душан Влаховиќ со глава донесе водство од 1:2.
Точка на натпреварот стави капитенот Александар Митровиќ во 77-та минута, кој беше прецизен од пенал за конечни 1:3. Ова беше негов 63-ти гол во дресот на репрезентацијата.
Мирковиќ: “Дојдов како прва помош”, Костиќ: “Сè уште патиме”
По натпреварот, привремениот селектор Зоран Мирковиќ изјави дека неговата мисија е завршена.
“Јас сум селектор на младата репрезентација. Дојдов овде како прва помош за овој натпревар, и тоа е тоа”, изјави Мирковиќ.
Филип Костиќ, пак, призна дека поразот од Албанија сè уште боли.
“Сè уште патиме поради сè што се случи. Мора да се држиме заедно. Ги замолувам и медиумите и навивачите да нè поддржат. Не ни е лесно ниту нам, ниту на нашите семејства”, изјави крилото на Јувентус.
Капитенот Митровиќ: “Верувам во чуда!”
Капитенот на српската репрезентација, вели дека атмосферата во екипата никогаш не била проблем, но сепак поразот од Албанија претставувал вистински тест.
“Додека постои шанса, ние ќе се бориме без оглед на тоа што се случуваше. Веруваме во чуда, бидејќи и претходно се случувале, како на натпреварот со Португалија. Еднаш успеавме да направиме чудо”.
