Нашиот фокус секогаш е насочен кон терените, паркетите и тркачките патеки. Но, спортот е ништо без луѓето. Без оние кои секој викенд ги полнат трибините, кои оставаат грло и дланки за своите клубови и кои, пред сè, ја сакаат својата татковина.
По повод 35 години од независноста на Македонија, правиме еден мал, но значаен исклучок. Ви претставуваме песна која, иако не е класична спортска химна, во себе го носи целиот оној набој, пркос и емоција што ги гледаме на нашите стадиони. Скопскиот бенд Последен Удар ја објави својата нова песна насловена „Пиреј“, и таа е токму она што ни требаше за овој празник.
„Ти си пиреј што преживува“ – емоција која удира во срцето
Текстот на песната е длабок, искрен и буди силни емоции. Тој не прашува што државата може да направи за нас, туку потсетува на нашата колективна издржливост. Стиховите одекнуваат како крик на една цела генерација:
„Што ли треба јас да направам за да ја вратам таа насмевка? Дали треба да те воскреснам за да те боли оваа приказна? Не си цвеќе да те откорнат. Не си птица да те преселат, не си корен да те отсечат. Ти си пиреј што преживува.“*
Овие зборови не се само поезија, тие се нашиот идентитет. Ние не сме „ветер со сила голема“, но сме народ кој опстојува, исто како пирејот.
Кадри исполнети со луѓе од нашето секојдневи, ликови кои ги среќаваме на улица, маалски херои, работници и секако, момците од трибините. Тоа е искрен приказ на една урбана, пркосна и жива Македонија, обединета под едно знаме и една идеја.
