Во светот на спортскиот маркетинг, често се слушаат идеи за воведување „плеј-оф“ систем во Премиер лигата за да се зголеми возбудата. Но, вистината е дека на англискиот фудбал не му требаат вештачки решенија. Традиционалниот формат, кој е „светост“ уште од 1888 година, повремено сам исфрла натпревари кои имаат тежина на вистинско финале.
Токму тоа нè очекува оваа недела на „Етихад“. Судирот меѓу Манчестер Сити и Арсенал не е само „голем натпревар“, тоа е монструозен дуел кој, како што вели Гари Невил, ќе ја дефинира целата сезона.
Зошто овој меч е толку редок?
Иако медиумите често претеруваат со епитетите, статистиката потврдува дека вакви пресметки толку доцна во сезоната се вистинска реткост. Во изминатите 33 сезони од ерата на Премиер лигата, само седум пати се случило првопласираниот и второпласираниот да се соочат во директен дуел во толку доцна фаза (Арсенал има уште 6, Сити уште 7 меча до крајот), а притоа разликата да биде помала од шест бода.
Последниот пат кога видовме нешто слично на вистинско „финале“ беше во 1989 година (пред ерата на ПЛ), кога Арсенал во последната секунда на „Енфилд“ му ја украде титулата на Ливерпул.
Историјата учи: Победникот на овие мечеви обично станува шампион
Ако погледнеме низ минатото, овие ретки „пресметки на врвот“ речиси секогаш го решавале патникот на тронот:
- 2002 година: Арсенал го победи Јунајтед на „Олд Трафорд“ во претпоследното коло и ја осигура титулата.
- 2010 година: Челси славеше кај Јунајтед со голот на Дрогба и го презеде врвот кој го задржа до крај.
- 2012 година: Легендарното дерби на Манчестер каде голот на Компани му донесе предност на Сити, крунисана со „Агуероооо“ моментот во последната секунда од сезоната.
- 2023 година: Сити немилосрдно го прегази Арсенал со 4:1 во април, ставајќи крај на сонот на „топчиите“ и трасирајќи го патот кон „триплетот“.
Да ги погледнеме подетално сите осум мечеви во кои играле првиот и вториот на табелата во Премиер лигата. Историјата нè учи дека победникот од овие дуели во 71,4% од случаите на крајот го подигнувал пехарот. Еве како завршувале овие епски пресметки низ годините:
Хронологија на „финалињата“ пред финалето:
1. Ливерпул – Манчестер Јунајтед 1:3 (19 април 1997) Јунајтед дојде на „Енфилд“ со два бода предност и натпревар помалку. Иако „ѓаволите“ имаа мали киксови претходно, Ливерпул беше во уште полоша форма. Тимот на Фергусон славеше среде Ливерпул и ја запечати својата четврта титула.
Шампион: Манчестер Јунајтед
2. Манчестер Јунајтед – Арсенал 0:1 (8 мај 2002) Арсенал дојде на „Олд Трафорд“ во страшна серија од 11 победи по ред. Им требаше само бод за титула, но Силван Вилторд со својот гол донесе победа и ја прекина тригодишната доминација на Јунајтед среде нивниот дом.
Шампион: Арсенал
3. Арсенал – Манчестер Јунајтед 2:2 (16 април 2003) Арсенал заостануваше три бода, но имаше меч помалку и подобра гол-разлика. Ремито значеше дека титулата е во нивни раце, но „топчиите“ необјасниво „издишаа“ против Болтон и Лидс, оставајќи му го патот отворен на Јунајтед.
Шампион: Манчестер Јунајтед
4. Челси – Манчестер Јунајтед 2:1 (26 април 2008) „Сините“ беа во налет од 18 меча без пораз и со оваа победа се израмнија со Јунајтед на врвот. Сепак, киксот во последното коло значеше дека 10-тата титула сепак замина во витрините на Сер Алекс Фергусон.
Шампион: Манчестер Јунајтед
5. Манчестер Јунајтед – Челси 1:2 (3 април 2010) Само еден бод ги делеше ривалите на шест кола до крајот. Челси извојува славна победа на „Олд Трафорд“ и ја задржа предноста до последниот ден, освојувајќи ја титулата со само еден бод разлика.
Шампион: Челси
6. Манчестер Јунајтед – Челси 2:1 (8 мај 2011) Една година подоцна, сценариото беше слично, но исходот поинаков. Јунајтед им се одмазди на „сините“ со ист резултат и со таа победа дефинитивно го потврди новиот примат во Англија.
Шампион: Манчестер Јунајтед
7. Манчестер Сити – Манчестер Јунајтед 1:0 (30 април 2012) Можеби најзначајниот меч во модерната историја на Сити. Голот со глава на Винсент Компани ги израмни градските ривали на врвот на две кола до крајот, што подоцна овозможи драмата со Агуеро и првата титула по 44 години.
Шампион: Манчестер Сити
8. Ливерпул – Челси 0:2 (27 април 2014) Единствениот меч на оваа листа каде ниту еден од двата тима не стана шампион. Славниот „кикс“ на Стивен Џерард му ја подари победата на Челси, а Манчестер Сити ја искористи оваа ситуација за да „прелета“ покрај двата тима и да го земе трофејот.
Шампион: Манчестер Сити
Клучни поенти кои ветуваат драма во недела:
- Ремито е „забрането“: Само еден од овие осум историски дуели завршил без победник.
- Второпласираните напаѓаат: Тимот кој брка (второпласираниот) победил на 4 од последните 5 вакви мечеви. Сепак, само 50% од тие екипи на крајот навистина ја освоиле титулата.
- Моментумот лаже: Од седумте тима кои во овие дербија влегувале со серија од најмалку три победи, само два успеале да победат на самиот дерби меч (28,6%). Ова е сериозно предупредување за тимот со подобра форма.
- Искуството е пресудно: Дури четири од петте екипи кои по победата во дербито станале шампиони, претходно веќе имале освоено титула во последните четири сезони. Единствениот исклучок? Манчестер Сити во 2012 година.
Моментот на вистината за Артета и Гвардиола
Овој натпревар доаѓа во специфичен момент. Арсенал во поголемиот дел од сезоната изгледаше пофокусирано и порезолутно, но неодамнешниот пораз во финалето на Карабао купот од Сити внесе црв на сомнеж кај младата екипа на Микел Артета.
Манчестер Сити, од друга страна, е „гладен“ да го врати приматот откако Ливерпул ја освои титулата минатата сезона. За Пеп Гвардиола, ова е шанса да ги стиши критичарите во ек на истрагите за финансиските прекршоци на клубот.
Математиката е јасна:
- Победа на Сити: Се доближуваат на три бода со натпревар помалку – предноста е на нивна страна.
- Реми: Арсенал ја задржува предноста од шест бода, психолошкиот импулс оди кај „топчиите“.
- Победа на Арсенал: Девет бода предност би значело дека титулата по 22 години конечно се враќа во Северен Лондон.
Недела нема да го дознаеме шампионот, но дефинитивно ќе дознаеме кој има карактер да биде тоа. Овој пат, целиот „хајп“ е апсолутно оправдан.
