Спектакуларната победа на Соединетите Американски Држави над Парагвај со 4-1 пред очите на холивудскиот крем во Лос Анџелес дефинитивно го лансираше Фоларин Балогун во нов апсолутен миленик на нацијата. Но, додека цела Америка слави и зборува за неговата синоќешна брутална партија, зад неговиот американски пасош се крие една од најневеројатните приказни во историјата на Светските првенства. Всушност, некаде во светот постои еден анонимен аеродромски службеник кој слободно може да си запише асистенција за овој мундијалски блесок на САД.
Како момчето кое израсна во академијата на лондонски Арсенал и ги помина сите младински категории на Англија заврши со дрес на САД? Одговорот е чиста случајност или судбина, како што претпочита да каже неговата мајка Флоренс.
Во далечната 2001 година, таа во седмиот месец од бременоста заминала на краток одмор во Њујорк. Кога дошло време за враќање дома во Лондон, службеникот на авиокомпанијата на излезот за качување едноставно одбил да ја пушти во авионот. Причината била големината на нејзиниот стомак, кој според нејзините зборови бил „масивен“ и претставувал преголем ризик за породување за време на прекуокеанскиот лет. Флоренс останала во Бруклин, каде што набрзо се родил малиот Фоларин. Тој ги поминал првите два месеци од својот живот во мал, двособен стан кај својата тетка пред лекарите да дадат дозвола за лет кон Англија. Токму тој строг аеродромски протокол синоќа го одреди победникот на „СоФи“ стадионот.
Брилијантна форма од Монако пренесена на големата сцена
Балогун пристигна на ова Светско првенство во страшна форма, задржувајќи го високиот ритам од францускиот шампионат каде за Монако оваа сезона постигна 18 гола во 43 настапи. Таа самодоверба на 24-годишниот напаѓач буквално прштеше од секој негов потег против Парагвајците.
Неговиот прв гол беше ремек-дело на смиреност. По уште еден брутален продор на Кристијан Пулишиќ по левата страна, кој буквално му ја изврте крвта на противничкиот дефанзивец Касерес, Балогун со извонреден, ладнокрвен удар со внатрешно ефе ја смести топката во долниот агол.
Вистинското шоу на расен стрелец пристигна при неговиот втор погодок, само неколку минути откако претходно еден гол му беше поништен поради тесен офсајд. Балогун прими една тешка топка, со застрашувачка физичка сила го издржа бруталниот дуел на дефанзивецот на Сандерленд, Омар Алдерете, комплетно го натрча парагвајскиот капитен Густаво Гомез и со фантастичен лак ја заби топката во самиот агол од казнениот простор. Тоа беше трет гол за САД, по почетниот автогол на Бобадиља по нафрлањето на МекКени.
Холивудски аплаузи за момчето од Бруклин
Од ложите на стадионот, ваквиот брутален дебитантски настап со очи полни воодушевување го следеа Том Круз, семејството Бекам, како и креаторот на „Војна на ѕвездите“, Џорџ Лукас, кој во еден момент беше уловен од камерите како опуштено јаде бургер со нозете кренати на оградата, уживајќи во шоуто на Балогун.
За американскиот напаѓач, ова е комплетно затворање на кругот на докажување. Времето кога како отпишан играч на Арсенал беше праќан на позајмица во Мидлсбро сега изгледа како далечно минато. Избраниците на Маурисио Покетино до крајот на мечот свесно го намалија гасот, Парагвај преку Маурисио постигна почесен гол, за на крајот Џо Рејна со надворешно ефе во судиското продолжение да ги постави конечните 4-1.
САД дефинитивно ги очекуваат далеку потешки тактички испити во продолжението од групната фаза против Турција и Австралија, но нацијата веќе верува во чудо. А сè започна затоа што еден авио-службеник во 2001 година си ја вршеше својата работа премногу сериозно.
