Вториот натпревар од отворањето на Светското првенство, кој за македонските фанови се одигра во доцниот ноќен блок, донесе исклучителна фудбалска драма во која Јужна Кореја со пресврт ја совлада Чешка со 2-1 во Гвадалахара. Но, покрај случувањата на теренот и големата триумфална ноќ за Азијците, овој натпревар веднаш ја активираше и првата голема контроверза на шампионатот – сериозно празни трибини кои јасно ги отворија прашањата за лакомоста на ФИФА со цените на билетите.
Драмата во Гвадалахара: Ладен туш, ВАР-спас и пресврт на Азијците
Јужна Кореја влезе во овој натпревар како доминантна екипа која во поголемиот дел од времето ја контролираше топката, но Чешка, која се врати на Мундијалите по цели 20 години пауза, се покажа како екстремно тврд противник. Европската селекција буквално немаше ниту еден директен удар кон голот сè до 59-та минута, кога се случи вистински шок. Владимир Цоуфал изведе силно, долго аут-фрлање во шеснаесеттникот, а чешкиот капитен Ладислав Крејчи скокна највисоко и со глава донесе водство од 1-0.
Азискиот одговор пристигна експресно по само осум минути. Креативецот на Феенорд, Хванг Ин-беом, прими топка од Ли Канг-ин, со брутален лажњак комплетно го измами излетаниот голман Матеј Ковар и со прекрасен лоб во празната мрежа израмни на 1-1.
Вистинскиот трилер се случи во финишот. Во 78-та минута Чесите одново почнаа да слават откако Томас Соучек со глава ја спроведе топката во мрежата по еден слободен удар, но по интервенција на ВАР-собата, голот беше поништен поради недозволена офсајд позиција.
Корејците веднаш го казнија овој момент; во 86-та минута, токму Хванг испрати остар центаршут, а резервистот Ох Хјеон-гју со директен налет и малку со среќа со еден „шпиц“ удар ја протна топката под голманот за конечни 2-1. Победата ја запечати искусниот голман Ким Сеунг-гју, кој во судиското продолжение одбрани чист зицер на Михал Садилек. Со ова, Јужна Кореја за првпат по четири мундијалски изданија успеа да го отвори шампионатот со три бода.
Скандалот со цените и фантомската посетеност на ФИФА
Додека претседателот на ФИФА, Џани Инфантино, пред само два дена се фалеше дека побарувачката за билети е „невидена во историјата и поголема за десет пати од претходно“, реалноста на стадионот „Акрон“ во Гвадалахара брутално го демантираше. Овој стадион е втор најмал на турнирот (капацитет од 45.664 седишта), но на телевизиските екрани јасно се гледаа огромни празни сиви зони, особено во централниот дел на трибините каде што се наоѓаат ВИП ложите.
Причината за овој дебакл е чист финансиски грабеж врз навивачите. Билетите за долниот прстен на стадионот чинеа астрономски 500 долари, додека најевтините на највисоките позиции на страничните трибини беа 400 долари. Дополнително, влезниците во таканаречените „хоспиталити“ зони се продаваа за нереални 5.000 долари. За град како Гвадалахара, кој е еден од поекономските ранливи домаќини на турнирот, овие цени се тотално нереални. На трибините доминираа неутрални мексикански навивачи со домашни дресови, имаше солидна група од Јужна Кореја, но речиси и да немаше навивачи од Чешка, кои покрај визите, се соочија со фактот дека нивната репрезентација ќе пропатува најмногу милји во групната фаза.
ФИФА се обиде да го сокрие скандалот објавувајќи официјална бројка од 44.985 присутни гледачи (што би значело дека само 700 седишта останале празни). Меѓутоа, визуелната слика покажа дека недостасуваат илјадници фанови. На новинарските прашања дали оваа бројка се однесува на реално поминати луѓе низ капите или на претходно купени и поделени корпоративни билети кои на крајот останале неискористени, портпаролот на ФИФА одби да даде конкретен одговор.
Снаодливоста на тимот го покри бледиот Сон Хеунг-мин
Овој Мундијал според сите најави треба да биде последното големо збогување на Сон Хеунг-мин со репрезентативниот фудбал. Сепак, 33-годишната легенда на Тотенхем во моментов ја пресликува својата слаба форма од американската МЛС лига, каде настапува за ЛАФЦ и сè уште нема постигнато ниту еден гол сезонава.
Сон синоќа ги имаше најдобрите шанси за својот тим во првиот дел, но во клучните моменти реагираше непрецизно. Најпрво шутираше непрецизно од 20 метри, а пред самиот крај на полувремето се заплетка во сопствените нозе при еден повратна топка. На почетокот на вториот дел, тој излезе сам пред противничкиот голман, но не успеа да ја поткопа топката над Ковар, а инстинктите кои со децении го красеа во Северен Лондон очигледно избледуваат со годините. Среќата за Корејците е што остатокот од тимот, предводен од фантастичниот Хванг, успеа да го компензира неговиот лош ден на теренот.
Математиката во Групата А по првото коло
По првите одиграни 90 минути, двата апсолутни фаворити во Групата А ја оправдаа својата улога. Мексико (по победата од 2-0 над Јужна Африка) и Јужна Кореја имаат по 3 бода и веќе се наоѓаат во пол-позиција. Во следното коло, на двете селекции им е потребна само уште една победа за математички да го осигураат пласманот во нокаут-фазата, додека Чешка ќе мора да оди на сè или ништо против Јужна Африка доколку сака да ги задржи мундијалските надежи во живот.
