Фудбалскиот клуб Вардар повлече сериозен потег за стабилизација на тимот, обезбедувајќи ги потписите на двајца стандардни првотимци на подолг рок. Димитар Тодоровски и Едиз Спахиу ја продолжија верноста кон „црвено-црните“ и ќе останат дел од најтрофејниот македонски клуб до јуни 2028 година.
Тодоровски останува „мотор“ во средниот ред
23-годишниот играч за врска, Димитар Тодоровски, кој пристигна во Вардар на почетокот на годината од Брера Струмица, брзо се наметна како важна алка во тимот. Со новиот договор, клубот испраќа јасна порака дека тој е дел од долгорочните планови.
Тодоровски е поранешен младински репрезентативец на Македонија и има богато прволигашко искуство со над 170 настапи во ПМФЛ.
Спахиу продолжува да „решета“
Вториот потпис доаѓа од нападот. Едиз Спахиу (24), кој исто така пристигна во зимскиот преоден рок од Тиквеш, доби доверба од раководството да го носи вардаровиот дрес во следните три и пол сезони.
Спахиу е познат како разноврсен напаѓач кој може да покрие повеќе позиции во офанзивата, а во својата кариера веќе има освоено два Купа на Македонија.
Со овие потези, Вардар покажува дека не мисли само на тековната сезона, туку гради костур на тимот за иднината.
