Секогаш нè радува кога ќе прочитаме изјава од професионални атлети кои сè уште веруваат во чистата убавина на спортот, па со задоволство ви ги пренесуваме нивните приказни.
Фудбалскиот “маестро” од Ерменија, Хенрих Мхитарјан, во интервјуто за “Sky Italia” беше прашан што ќе прави следно во неговата кариера откако ќе го напушти италијанскиот Интер.
“После Интер ќе престанам. Не сакам да го спуштам нивото. Нема да одам да играм назад во Ерменија или дестинации како Саудиска Арабија. Тоа не ме интересира. Со целосна почит, јас го сакам фудбалот поради играта, а не поради парите”, изјави легендата на ерменскиот фудбал.
Мхитарјан – тивок лидер во “неразурите”
Кога Интер го донесе Мхитарјан во 2022 година, малкумина очекуваа дека Ерменецот ќе стане толку клучен дел од тимот. Но, искуството, интелигенцијата и смиреноста што ги внесе во средниот ред на Интер се непроценливи.
Мхитарјан стана мотор на играта на Симоне Инзаги – човекот што знае кога да ја забрза играта, кога да го “успори темпото” и кој никогаш не ја губи топката лесно.
Со тек на времето, Ерменецот се избори за стартно место, покажувајќи дека и на 35 години може да биде двигател на тимот кој ја освои Серија А и остави белег во Европа.
Фановите го нарекуваат “маестро без врева”, а тренерите му веруваат без двоумење. Интер со него доби стабилност, мудрост и играч кој знае што значи голем натпревар.
