Кога станува збор за македонската ракометна репрезентација, зборот „лесно“ едноставно не постои во речникот. Нашите ракометари ја завршија групната фаза на ЕП 2026 со победа над Романија од 24-23, но патот до овие два бода беше вистински „ролеркостер“ кој ги искина нервите на македонската фаланга.
На крајот, кога се чинеше дека сè е загубено, Ненад Костески во последната секунда ја смести топката во мрежата за голем триумф и заслужено славење!
Од перфектен почеток до „црни минути“
Македонија влезе во мечот како „фурија“. Пет-еден зоната на Лазаров беше нерешлива енигма за Романците, кои цели 11 минути не знаеја како се постигнува гол. Со головите на Џонов, Костески и капитенот Кузмановски, брзо стигнавме до 4-0, а на полувреме заминавме со солидни 13-9 по атрактивниот „цепелин“ на Џонов и Костески.
Сепак, како што е веќе обичај, наместо рутински да го приведеме мечот кон крај, во второто полувреме сами си ја искомпликувавме ситуацијата. Пропуштивме неколку напади за „плус шест“, што им даде крилја на Романците полека да ја топат предноста.
Драма, црвени картони и победничкиот крик на Костески
Настапи криза каква што ретко се гледа. Михаил Аларов заработи директен црвен картон, Кузмановски беше исклучен во клучните моменти, а Романија го искористи тоа за прво израмнување на мечот во 55-та минута (22-22).
Во последните две минути се играше „кошарка“. Романија имаше напад за водство, но погреши. На спротивната страна, по еден остар старт врз Атанасијевиќ, романскиот бек Кумпаничу исто така заработи црвен картон. Кузмановски погоди од пенал за 23-22, но Романија израмни на само десет секунди до крајот.
И тогаш, кога сите очекуваа реми, Македонија повлече молскавична контра, а Ненад Костески стана херојот на нацијата, погодувајќи за конечни 24-23 точно со звукот на сирената!
Кузмановски повторно „мотор“ на екипата
Филип Кузмановски повторно покажа зошто е лидер на оваа генерација, постигнувајќи 9 гола. Ненад Костески додаде 4 (вклучувајќи го клучниот), додека Митев и Ѓорѓиев постигнаа по три. Кај Романија најефикасен беше Нистор со 8 погодоци.
Слатко, но со многу поуки
Победа си е победа и секогаш е убаво да се заврши првенството со кренати глави. Но, не смееме да ги затвориме очите пред падот во второто полувреме и да ни биде малку криво што не победивме со убедлива разлика за да може да се надеваме на убедлив триумф вечер на Данска. Македонија имаше неколку шанси за нокаут, но наместо тоа, дозволивме противникот да ни приреди инфаркт завршница. Како и да е, ова е важен триумф за самодовербата на овој млад состав кој допрва треба да расте и за подобар противник во квалификациите за Светското првенство.
Нашите момци си ја завршија задачата, со многу мака, но со огромно срце!
