Вечерта во Евролигата помина во знакот на екипите кои славеа на гостински терен, но и на доминацијата на шпанските и грчките гиганти. Додека „вечитите“ од Белград ги носеа бодовите од Кнежевството и Минхен, фаворитите на домашен терен не дозволија изненадувања.
Големи победи за Звезда и Партизан на гости
Црвена Звезда приреди сензација во Монте Карло, победувајќи го Монако со 96:100 по продолжение. Извонредниот Ебука Издунду со 22 поени и 12 скокови беше клучниот фактор за триумфот на тимот на Саша Обрадовиќ.
Партизан конечно ја прекина црната серија од седум порази, славејќи во Минхен кај Баерн со 63:67. Иако нашиот Нено Димитријевиќ постигна 10 поени за Баварците, Камерон Пејн и Исак Бонга беа пресилни во финишот за гостите од Белград.
Олимпијакос и Панатинаикос сигурни пред своите навивачи
Олимпијакос ја запиша својата шестта победа во последните седум меча, совладувајќи го Макаби Тел Авив со 100:93. Натпреварот беше решен во втората четвртина кога грчкиот гигант направи неверојатна серија од 20:0, заминувајќи на одмор со огромни +24 (58:34). Иако Макаби се врати во игра во последната четвртина и намали на едноцифрена разлика, тимот на Јоргос Барцокас не дозволи пресврт. Саша Везенков одигра маестрално со 28 поени, додека Никола Милутинов доминираше во рекетот со 13 поени и 9 скокови.
Во Атина, Панатинаикос немаше милост за Басконија и славеше со убедливи 93:74. Натпреварот го одбележа неверојатната партија на Василис Толиопулос, кој постигна 21 поен, иако неговиот сезонски просек е едвај 1.5 поени по меч. Избраниците на Ергин Атаман уште во првата четвртина направија двоцифрена предност која само ја зголемуваа до крајот.
Хапоел Тел Авив го задржа врвот по голема битка со Ефес
Во физички исцрпувачки натпревар одигран во Софија, Хапоел Тел Авив славеше против Анадолу Ефес со 71:66. Иако Ефес водеше со десет поени разлика на почетокот на второто полувреме (35:45), лидерот на табелата покажа зошто е на врвот. Клучната улога ја одигра Крис Џонс, кој при резултат 62:62 постигна важни поени во контранапад, а потоа и одлучувачка тројка на 24 секунди пред крајот.
Драма во Барселона
Највозбудливо беше во „Палау Блауграна“, каде Барселона го победи Дубаи со 91:89. Иако домаќините прокоцкаа предност од 12 поени во последната четвртина, Дарио Бризуела со кош на 2,3 секунди пред крајот донесе големо славје за Каталонците.
Реал Мадрид пресилен за Милано во „Мовистар Арена“
Реал Мадрид ја продолжи својата победничка серија на пет натпревари откако го совлада Милано со убедливи 106:77. Иако гостите почнаа храбро, серијата на Реал од 11:2 во првата четвртина ги постави темелите за победата. Клучниот момент се случи во вториот период кога „кралевите“ ја ограничија италијанската екипа на само 13 поени. Треј Лајлс беше одличен од клупата со 17 поени, додека Марио Хезоња додаде 13. За Милано, најефикасен беше Марко Гудуриќ со 15 поени, но тоа не беше доволно за да се спречи 11-тиот домашен триумф на Реал сезонава.
Кам Тејлор со партија на кариерата за триумф на Валенсија
Валенсија се врати на победничките патеки со триумф над Париз од 98:84. Домашните кошаркари уште од самиот старт наметнаа силно темпо и брзо стигнаа до двоцифрена предност. Иако Париз успеа да намали на осум поени негатива до полувремето (50:42), Валенсија со силен старт на третата четвртина ја реши дилемата околу победникот. Кам Тејлор одигра неверојатен меч постигнувајќи рекордни во кариерата 28 поени, додека Жан Монтеро одлично ја организираше играта со 9 поени и 8 асистенции.
Жалгирис го „расипа“ дебито на Асвел во новата недела
Жалгирис Каунас стигна до важна гостинска победа кај Асвел со 77:96. Литванскиот тим го отвори мечот со фуриозна серија од 2:17, но Французите успеаја да се вратат до полувремето. Сепак, во третата четвртина на сцена стапи незапирливиот Мозес Рајт, по чија заслуга Жалгирис направи нова серија од 2:18 и создаде недостижна предност. Силван Франциско ги предводеше стрелците со 20 поени, а Жалгирис покажа одлична реализација за два поени од дури 71.4%. Кај Асвел, Томас Ертел постигна 21 поен, но немаше вистинска поддршка од соиграчите.
Следете нè: Facebook | Instagram | X
