Фудбалскиот клуб Интер уште еднаш докажа дека е лидер во иновациите и истражувањето на нови територии, овојпат преку соработка со култниот бренд Nike ACG (All Conditions Gear). На 20 јануари, во срцето на снежните планини во Пиемонт, се одржа „All Conditions Cup“ – фудбалски настан каков што досега не е виден.
Натпревар каде дрвјата и карпите се дел од играта
Наместо на совршен зелен тепих, гостите и учесниците по долга прошетка низ снегот пристигнаа до неверојатен терен: снежно поле интегрирано во алпскиот пејзаж, каде дрвјата и карпите беа составен дел од акцијата.
Натпреварот се играше по т.н. „правила на природата“. Покрај природните пречки, беа воведени и три специјални портокалови картони (круг, триаголник и квадрат), кои отклучуваа уникатни предности како: „еден на еден“ дуел на голманите, специјален шут зад централната карпа или привремено исклучување на противнички играч.
❄️ ACG and Inter collaborated on something special in the mountains pic.twitter.com/ZW0eq7tHyr
— COPA90 (@Copa90) January 20, 2026
Легендите Фиго и Жулио Цезар во улога на тренери
Ѕвезди на настанот беа легендите на „Нераѕурите“, Луис Фиго и Жулио Цезар. Поранешниот најдобар светски фудбалер и легендарниот бразилски голман ги предводеа екипите како тренери, носејќи дополнителен престиж на овој снежен турнир.
Победник на крајот беше тимот на Жулио Цезар, кој го подигна уникатниот трофеј „Wooden Goat“, рачно изработена дрвена статуа на коза со фудбалска топка, дело на миланскиот уметник Никола Лорини.
Премиера на новиот „четврти“ дрес
Сите учесници ја носеа новата ексклузивна колекција Nike ACG x Inter, вклучувајќи го и четвртиот дрес на клубот. Дизајнот доминира со препознатливите црна, „Hyper Blue“ сина и „Safety Orange“ портокалова боја.
Овој дрес веќе ја имаше својата официјална премиера на „Сан Сиро“ минатиот петок на натпреварот против Пиза, а утре (недела) за првпат ќе го носат и дамите на Интер на гостувањето кај Комо. Новата колекција веќе е достапна во официјалните продавници на Интер и на нивната онлајн продавница.
