Астон Мартин е последниот тим кој ги откри своите карти пред почетокот на новата ера во Формула 1. На специјален настан во Дахран, тимот го претстави дизајнот за својот нов болид – AMR26. Ова не е само уште еден нов модел, туку првиот предизвикувач дизајниран под лидерство на генијалниот Адријан Њуи, човекот кој стои зад најдоминантните болиди во историјата на спортот.
A moment in time.
— Aston Martin Aramco F1 Team (@AstonMartinF1) February 9, 2026
Built on what came before. Designed for what comes after.
Our 2026 livery. Revealed. pic.twitter.com/gAFfo5bUYd
Почеток на фабричката ера со Хонда
Сезоната 2026 означува историска пресвртница за тимот на Лоренс Строл. Астон Мартин за првпат станува целосен фабрички тим преку партнерството со Хонда, која ќе ги снабдува со ексклузивни погонски единици.
Со комплетирањето на новиот технолошки кампус и доаѓањето на врвни инженерски имиња како Енрико Кардиле, тимот ги има сите потребни алатки за да ги нападне врвните позиции. Извршниот претседател Лоренс Строл порача дека секој чекор е внимателно планиран со една јасна амбиција: градење на тим способен за победи.
Филозофијата на Њуи и гладтта на Алонсо
Адријан Њуи, кој покрај техничката улога ќе дејствува и како тимски шеф, објасни дека кај AMR26 фокусот е ставен на „холистички пристап“. Според него, кај новите правила не станува збор за една доминантна компонента, туку за тоа како целиот пакет соработува со новата погонска единица.
Фернандо Алонсо и Ленс Строл веќе имаа можност да го почувствуваат болидот за време на „шејкдаунот“ во Барселона, а двократниот светски шампион не го криеше својот ентузијазам за соработката со Њуи, нарекувајќи го овој период највозбудливо поглавје во историјата на тимот.
Што нè очекува во Бахреин
Иако дизајнот беше претставен на концепт-болид, вистинскиот AMR26 ќе го видиме на патеката за само неколку дена во Бахреин. Ленс Строл нагласи дека сега приоритет е разбирањето на болидот и постојаното носење на надградби низ сезоната.
Со оглед на тоа што Њуи е мајстор за регулаторни промени, сите очи ќе бидат вперени во зелениот болид кога ќе почнат официјалните тестирања од 11 до 13 февруари. По ерата на доминација на Мекларен и Ред Бул, прашањето е дали Астон Мартин е новиот „крал“ на Формула 1.
