Американската скијачка икона Линдзи Вон се огласи од болничкиот кревет по третата операција на нејзината скршена нога. Ова доаѓа само три дена по страшниот пад во спуст на Олимписките игри во Милано-Кортина 2026, каде Вон се обиде да направи невозможното и да се бори за медал со веќе скинати предни вкрстени лигаменти (ACL).
„Успехот денес има поинакво значење“
Преку емотивна објава на Инстаграм, 41-годишната Вон сподели фотографија од болницата, известувајќи ги навивачите за својот напредок.
„Денес ја имав мојата трета операција која помина успешно. Зборот успех денес има сосема поинакво значење отколку пред неколку дена. Напредувам, и иако е бавно, знам дека ќе бидам добро“, напиша Вон, заблагодарувајќи им се на медицинскиот персонал и семејството за поддршката.
Семејна драма на патеката
Падот во Кортина д’Ампецо беше трауматичен за сите присутни, особено за нејзиното семејство кое во живо го следеше обидот за херојски поврат. Нејзиниот татко, Алан Килдоу, кој беше во шок по сцените каде Линдзи со хеликоптер беше пренесена во болница, сега е дециден дека ова мора да биде последната трка во нејзината кариера.
„Таа има 41 година и ова е крајот. Нема повеќе скијачки трки за Линдзи Вон, барем додека јас се прашувам за нешто“, изјави Килдоу, опишувајќи го ударот како „драматичен и трауматичен“.
Без каење за храбриот обид
Вон пред само една недела ги скина вкрстените врски на коленото на тренинг во Швајцарија, но одби да се повлече и се појави на стартот во Кортина. За жал, при голема брзина удри во една од портите и доживеа тежок пад пред очите на своето семејство.
И покрај болката и долгиот пат до закрепнување што ја чека, Линдзи вели дека воопшто не жали што се обидела да се бори за медал на свои 41 година. За неа, границите постојат за да се поместуваат, дури и кога телото вели „доста“. Сега нејзиниот фокус е целосно насочен кон рехабилитацијата, додека целиот спортски свет и испраќа пораки за побрзо закрепнување.
