Иако двата тима влегоа во овој дуел десеткувани од повреди (Наполи без Де Брујне и Мектоминеј, Рома без Дибала и Довбик), тоа не го спречи напаѓачкиот фудбал. Стадионот „Диего Армандо Марадона“ беше сведок на „шоуто“ на јануарските засилувања кои покажаа дека веќе се клучни фигури во своите нови тимови.
Доњел Мален е новиот миленик на „волчицата“
Рома започна фуриозно. Само седум минути му беа потребни на екс-напаѓачот на Астон Вила, Доњел Мален, да го замолкне Неапол. По одличната акција на дебитантот Сарагоса, Мален со лизгачки старт ја смести топката во мрежата за 0:1. Тоа беше негов четврти гол на петтиот натпревар во Серија А, статистика која ветува многу за навивачите на Рома.
Спинацола ја „казни“ поранешната љубов
Наполи не се предаваше, а израмнувањето дојде од „детето“ на Рома. Леонардо Спинацола во 40-та минута упати вистински проектил од далечина, кој со мала помош од девијацијата на Писили, заврши зад грбот на немоќниот Свилар за делириум на трибините.
We’re back level in Naples ⚖️
— Football on TNT Sports (@footballontnt) February 15, 2026
Leonardo Spinazzola has a pop from range, which deflects over Mile Svilar and into the back of the net!
📺 @tntsports & @discoveryplusUK pic.twitter.com/4LMcRGjxIj
Драма во вториот дел и емоциите на Алисон
Второто полувреме донесе нов шок за домашните. Рахмани направи невнимателен прекршек врз Бразилецот Весли во шеснаесеттникот, а судијата покажа на белата точка. Мален со ладнокрвна реализација во горниот агол стигна до својот втор гол на мечот и донесе нова предност за тимот на Гасперини во 71-та минута.
Сепак, последниот збор го имаше новото име – Алисон Сантос. Јануарското засилување на Конте покажа зошто беше донесен во Неапол. По одличното проигрување на Џоване, Алисон со разорен удар од работ на казнениот простор погоди за 2:2 во 82-та минута. Бразилецот не можеше да ги сокрие емоциите, славејќи го својот прв гол во синиот дрес со солзи во очите.
До крајот, Свилар со крајни напори го одбрани ударот на Гутиерез, спречувајќи целосен пресврт и обезбедувајќи по еден бод за двата гиганти.
