Италијанскиот гигант Интер почувствува колку може да биде суров фудбалот во Арктичкиот круг. По поразот од 3:1 од Бодо/Глимт, тренерот Кристијан Киву не го криеше разочарувањето, но она што најмногу ги преплаши навивачите на „нераѕурите“ не е резултатот, туку состојбата на нивниот капитен, Лаутаро Мартинез.
Киву: „Теренот не е изговор, но беше проблем“
По натпреварот, романскиот стратег призна дека неговите играчи се мачеле да се прилагодат на специфичната подлога на „Аспмира“. Вештачката трева во комбинација со брзината на домашните играчи се покажа како нерешлива енигма за одбраната на Интер.
„Се обидовме, и покрај теренот. Не сакам тоа да биде изговор, но тие се многу понавикнати на оваа подлога. Не можам да бидам премногу строг кон моите играчи, знаевме дека Бодо е опасен на транзиции и нè изненадија со нивната брзина“, изјави Киву.
Шокантни вести за Лаутаро Мартинез
Најкритичниот момент на вечерта не беше примениот гол, туку повредата на Лаутаро Мартинез. На прес-конференцијата, Киву употреби загрижувачки збор кога беше запрашан за Аргентинецот – рече дека Лаутаро е „изгубен“.
„Тоа значи дека Лаутаро се повреди и изгледа дека е доста сериозно. Мислам дека ќе биде надвор од терените подолго време. Имаме неколку проблеми за кои мораме сериозно да размислиме“, заклучи тренерот на Интер.
Реваншот на „Џузепе Меаца“ – Мисија (не)возможна?
Интер сега има негатива од два гола која ќе мора да ја анулира следната недела на свој терен. Иако „Џузепе Меаца“ е тврдина каде навивачите на Интер создаваат пеколна атмосфера, прашање е како екипата ќе реагира без својот лидер во нападот и под притисокот од нестварната форма на Норвежаните.
Едно е сигурно: на домашниот трен во Милано, Киву и неговите момци нема да можат да го обвинат теренот. Ако не успеат да го свртат резултатот на својот „Меаца“, арктичката бајка на Бодо/Глимт ќе стане најголемата сензација во новата ера на Лигата на шампионите.
