Најдобриот стрелец во историјата на Голден Стејт Вориорс, Стеф Кари, ќе биде надвор од стројот уште најмалку десет дена поради болки во десното колено. Иако резултатите од магнетната резонанца се чисти и не покажуваат структурно оштетување, коленото продолжува да му прави проблеми на лидерот на тимот.
Збогум за All-NBA тимот и индивидуалните признанија
Оваа пауза носи и една болна реалност за Кари. Со оглед на тоа што досега одигра само 39 од 55 натпревари, а сега ќе пропушти уште најмалку пет, Стеф официјално нема да ја достигне границата од 65 одиграни натпревари.
Според строгите правила на НБА, ова значи дека Кари оваа сезона нема да биде во конкуренција за All-NBA тимовите, ниту за која било друга индивидуална награда на крајот од сезоната.
Кер: „Стеф почувствува дека не е во ред“
Тренерот Стив Кер објасни дека планот бил Кари да се врати на тренинзи по паузата, но телото на ветеранот кажало „не“.
„Се врати, но едноставно не се чувствуваше добро. Овие момци најдобро знаат кога се подготвени, а кога не. Знаеше дека не е паметно да влезе во полн тренинг со ваква непријатност во коленото. Ќе му дадеме уште 10 дена мир, па потоа ќе правиме нова евалуација“, изјави Кер пред дуелот со Бостон.
Што понатаму за Голден Стејт?
Без својата прва ѕвезда, „Воините“ ги очекува пеколен распоред. Кари сигурно ќе ги пропушти дуелите до почетокот на март, а тимот се надева на негово враќање за гостувањето во Хјустон на 5-ти март. Дотогаш, целиот товар паѓа на остатокот од ростерот кој ќе мора да го задржи тимот во трката за плејофот во пресилната Западна конференција.
НБА сезоната без Стеф Кари во полн сјај едноставно не е иста, но здравјето на „шерифот“ е приоритет за Голден Стејт ако сакаат да направат нешто повеќе во април и мај.
