Ако поразот во Норвешка беше шок, реваншот во Милано е вистинска катастрофа. Интер е елиминиран од Лигата на шампионите откако и на домашен терен загуби од храбриот Бодо/Глимт со 1-2, завршувајќи го својот европски пат со понижувачки вкупен резултат од 2-5.
Kjør da Champions League🤌 pic.twitter.com/otRfzR0Qu4
— FK Bodø/Glimt (@Glimt) February 24, 2026
Залудна опсада и мајсториите на Хаикин
„Нероаѕурите“ тргнаа на сè или ништо уште од првата минута. Димарко, Фратези и младиот Еспозито редеа шанси, но на голот на Норвежаните стоеше несовладливиот Никита Хаикин. Голманот на гостите правеше чуда, сопирајќи ги сите обиди на момците на Кристијан Киву, додека притисокот на „Сан Сиро“ стануваше сè потежок за нозете на домашните фудбалери.
Кошмарот на Аканџи и егзекуцијата на Хауге
Наместо пресврт, во второто полувреме се случи целосен колапс. Трагичар на вечерта беше Мануел Аканџи. Искусниот дефанзивец, кој веќе играше со завој на главата, направи кардинална грешка и му ја подари топката на Бломберг. Сомер успеа да го одбрани првиот удар, но Јенс-Петер Хауге беше на вистинското место за 0-1 и молк во Милано.
Кога Хакон Евјен во 81-та минута погоди за 0-2 по уште една контра, веќе беше јасно – анакондата на Интер е мртва. Сè што успеа домашниот тим беше почесен гол на Алесандро Бастони во финишот, кој беше само слаба утеха за „Нероаѕурите“.
Крај на една ера?
Интер, тимот кој играше две европски финалиња во последните три години, испаѓа од анонимен (на хартија) противник со два порази. Отсуството на Лаутаро Мартинез се покажа како ненадоместлив хендикеп, но грешките во одбраната и немоќта да се пробие норвешкиот бедем ќе бидат тема на сериозни анализи во наредните денови.
