Јувентус синоќа покажа дека е многу повеќе од обичен клуб во криза. Со играч помалку повеќе од еден час, „бјанконерите“ успеаја да ја надополнат негативата од три гола, но паднаа во продолженијата. По натпреварот, Мануел Локатели со треперлив глас и очи полни солзи зборуваше за епската борба на „Алијанц Стадионот“.
„Ова е вистинскиот Јувентус“
Локатели, кој беше моторот на тимот во средниот ред, призна дека болката од елиминацијата е огромна токму затоа што тимот навистина верувал во пресврт.
„Искрено, ми се плаче. Навистина верувавме дека можеме. Го вложивме срцето, душата, па дури и повеќе од тоа во овој меч. Сакам да им се заблагодарам на сите соиграчи од дното на моето срце. Атмосферата на стадионот беше неверојатна, ова се ноќи кои остануваат со вас засекогаш. Ја црпевме целата енергија од навивачите“, изјави емотивниот Локатели за „Amazon Prime Video“.
Лекција по борбеност и покрај елиминацијата
Јувентус цела сезона беше мета на критики поради недостиг на жар и борбеност, но вечерва никој не можеше да им префрли ништо на избраниците на Спалети. Сцените каде Кефрен Турам плаче на аут-линијата по голот на Меккени најдобро покажуваат колку овој натпревар му значеше на тимот.
„Ова е Јувентус каков што сакаме да го гледаме и каков што мора да бидеме секогаш. Мораме да продолжиме по овој пат и да не ја губиме вербата. Можам само да им честитам на сите, грешки се случуваат, но борбата беше без поштеда“, додаде капитенот на „Старата Дама“.
Фокус на дербито со Рома
Иако раната од Лигата на шампионите е сè уште свежа, Јувентус нема време за претерано жалење. Локатели веќе го најави следниот голем предизвик: „Сега мораме да ја пренесеме оваа енергија во Серија А. Не очекува важен натпревар против Рома и мораме да се фокусираме на тоа“.
Навивачите во Торино, и покрај поразот, го испратија тимот со громогласен аплауз, препознавајќи дека вечерта на теренот видоа „титани“ кои не се предаваат до последната секунда.
