Изминатата ноќ во најсилната кошаркарска лига во светот донесе многу возбудувања, а во центарот на вниманието беше Чикаго, каде младиот Австралиец Џош Гиди испиша нови страници во историјата на „биковите“.
Чикаго Булс – Милвоки Бакс 120:97
По катастрофалниот февруари без ниту една победа, Чикаго Булс конечно ја прекинаа низата од 11 порази. Клучна беше серијата од 27-0 со која целосно го шокираа Милвоки. Џош Гиди беше незапирлив со 20 поени, 14 скокови и 10 асистенции, со што го израмни рекордот на Скоти Пипен со 15 трипл-дабл учиноци во дресот на Булс. Кај Бакс, кои играа без повредениот Јанис Адетокумбо, Боби Портис постигна 18 поени.
Лос Анџелес Лејкерс – Сакраменто Кингс 128:104
Лејкерси го потврдија враќањето во форма со убедлив триумф над регионалниот ривал. Лука Дончиќ доминираше со 28 поени и 9 асистенции за само три четвртини, додека Леброн Џејмс додаде 24 поени. Лејкерси блеснаа со шутот за три поени (18 погодени тројки), а Сакраменто ниту во еден момент не успеа да го загрози водството на домаќините.
Њујорк Никс – Сан Антонио Спарс 114:89
Њујорк ја прекина серијата од 11 последователни победи на Сан Антонио. По совршениот февруари, Спарси потфрлија на стартот на март. Микал Бриџис постигна 25 поени, а Џејлен Брансон додаде 24. Иако Виктор Вембањама имаше 25 поени и 13 скокови, тоа не беше доволно да се сопре налетот на Никси, кои направија клучна серија од 26-2 уште во првиот дел.
Кливленд Кавалирс – Бруклин Нетс 106:102
Џејмс Харден се врати на теренот со скршен палец и веднаш донесе победа за Кливленд. „Брадата“ постигна 22 поени, 9 скокови и 8 асистенции, додека Џарет Ален додаде 20 поени. Ова беше осми пораз во низа за Бруклин, за кои најефикасен беше Мајкл Портер Џуниор со 26 поени.
Минесота Тимбервулфс – Денвер Нагетс 117:108
Во битката за врвот на Западот, Минесота беше поуспешна од актуелниот шампион од 2023 година. Ентони Едвардс постигна 21 поен, а Боунс Хајланд одигра одличен меч против својот поранешен тим со 18 поени. На Денвер не му помогна ниту монструозната партија на Никола Јокиќ (35 поени, 13 скокови и 9 асистенции).
Мемфис Гризлис – Индијана Пејсерс 125:106
Иако без Џа Морант веќе 17-ти натпревар по ред, Мемфис лесно се справи со Индијана. Тејлор Хендрикс со 19 поени беше лидер на тимот каде дури пет играчи постигнаа над 16 поени. Кај Пејсерси, Џарејс Вокер беше најефикасен со 21 поен.
Атланта Хокс – Портланд Трејлблејзерс 135:101
Хокс го демолираа Портланд благодарение на одличната прва четвртина. Ониека Оконгву постигна 25 поени, а Џонатан Куминга додаде 20 поени од клупата. Ова е четврта победа во низа за Атланта со која тимот конечно стигна до неутрален сооднос (31-31) во сезоната.
Детроит Пистонс – Орландо Меџик 106:92
Лидерот во НБА лигата продолжува да гази. Кејд Канингем со 29 поени и 11 асистенции ги предводеше Пистонси до шестата победа во низа на гостински терен. Паоло Банкеро постигна 24 поени за Орландо, но имаше дури девет изгубени топки.
Бостон Селтикс – Филаделфија 76ерс 114:98
Бостон стана четвртиот тим во лигата што стигнал до 40 победи сезонава. Немијас Квета одигра натпревар на кариерата со 27 поени и 17 скокови, додека Џејлен Браун додаде исто толку поени. Кај Филаделфија, Тајрис Макси постигна 33 поени, но немаше поддршка од соиграчите.
Оклахома Сити Тандер – Далас Маверикс 100:87
Шаи Гилџус-Александер испиша историја со 30 поени, станувајќи првиот играч со 20+ поени на 59 последователни гостувања. Оклахома го лимитираше Далас (кој играше без Купер Флег) на најнизок број поени сезонава, прекинувајќи ја низата на Мавс од 41 натпревар со постигнати над 100 поени.
Лос Анџелес Клиперс – Њу Орлеанс Пеликанс 137:117
Клиперси ја прекинаа својата серија од три порази со лесна победа над Пеликанс. Кавај Ленард постигна 23 поени во меч кој Клиперси го водеа од почеток до крај. Њу Орлеанс беше хендикепиран поради неиграњето на Зајон Вилијамсон кој го повреди глуждот.
