Изминатата ноќ во најсилната кошаркарска лига на светот донесе возбудливи дуели, деби настапи на нови ѕвезди и неколку шокантни пресврти. Бостон покажа зошто е шампион, додека Голден Стејт продолжува да тоне без својот лидер.
Селтикс пресилни за Милвоки: Причард и дебитантот Гонзалез блеснаа
Милвоки Бакс конечно го дочекаа враќањето на Јанис Антетокумпо по паузата од месец и половина, но тоа не беше доволно против моќниот Бостон. „Келтите“ славеа убедливо со 108:81, доминирајќи во одбраната во текот на целиот меч.
Херој на вечерта беше Пејтон Причард со 25 поени, но вистинско откритие е дебитантот Хуго Гонзалез, кој со 18 поени и 16 скокови постави рекорди во својата млада кариера. Јанис заврши со 19 поени и 11 скокови, но беше видливо дека му недостасува ритам по долгата пауза.
Дјурант и Шенгун доминантни во Вашингтон
Хјустон Рокетс ја продолжија одличната форма со победа над Вашингтон (123:118). Алперен Шенгун беше незапирлив со 32 поени и 13 скокови, додека Кевин Дјурант додаде 30 поени во својата прва средба близу родниот дом во Мериленд оваа сезона.
Мечот го одбележа и инцидент – Тре Јанг, кој наскоро треба да дебитира за Вашингтон, беше исклучен иако седеше на клупата, поради втрчување на теренот и жестоки приговори кон судиите.
Мареј и Јокиќ „преживеаја“ во Солт Лејк Сити
Денвер Нагетс со големи маки го совладаа десеткуваниот тим на Јута Џез со 128:125. Џамал Мареј беше во „оган“ постигнувајќи дури 45 поени, вклучувајќи ги и клучните слободни фрлања во финишот.
Драмата го достигна врвот по една судиска одлука на 16 секунди до крајот, кога беше поништен фаул на Никола Јокиќ кој требаше да биде негов шести и да ја прати Јута на линијата за слободни фрлања. Јокиќ мечот го заврши со 22 поени и 12 скокови.
Клиперси со голем пресврт против „осакатените“ Вориорс
Голден Стејт испушти предност од 17 поени и загуби од ЛА Клиперс со 101:114. Без повредениот Стеф Кари и „мистериозно“ болниот Кристапс Порзингис, „воините“ немаа сили за завршницата.
Кај Клиперси, Каваи Ленард беше лидер со 23 поени, а дебитираше и Дариус Гарланд (пристигна од Кливленд во замена за Џејмс Харден). Гарланд постигна 12 поени, иако заработи незгоден удар во лицето по судир со Мозес Муди.
