Екипата на Вардар 1961 е вториот патник на „Фајнал-фор“ турнирот во Купот на Македонија, откако во финалниот натпревар од својата четвртфинална група славеше над Еурофарм Пелистер 2 со 27-22. Избраниците на Иван Чупиќ успешно ја завршија задачата во Скопје и им се придружија на битолските „зелено-бели“ во борбата за трофејот.
Младите битолчани „покажаа заби“ во првиот дел
Вардар силно го отвори натпреварот и по само 15 минути игра веќе имаше солидна предност од 9-5. Сепак, ракометарите на Еурофарм Пелистер 2 не се предадоа и со борбена игра успеаја да ја стопат негативата, па на пауза заминаа со само два гола заостанување (14-12).
Еспиња го заклучи голот кога беше најпотребно
Во второто полувреме се играше гол за гол, а клучниот момент се случи при резултат 18-17. Гостите имаа шанса за израмнување, но откако не ги искористија своите напади, на сцена стапи голманот Мигел Еспиња. Со неколку врвни интервенции, тој им овозможи на своите соиграчи лесни голови преку Пинто и Митровиќ, по што Вардар се одлепи на недостижни 24-19.
Митровиќ лидер, Славков најефикасен на мечот
Иван Чупиќ мудро ја распредели минутажата на целиот тим, со оглед на претстојниот важен дуел против Мелсунген во Лигата на Европа. Најефикасен кај Вардар беше Митровиќ со шест гола, додека Анастасовски и Лазаревски додадоа по три. Голманскиот тандем Еспиња-Гогов заврши со вкупно 13 одбрани.
Кај поразениот тим на Пелистер 2, блескаше Славков кој постигна дури девет погодоци, но тоа не беше доволно за сензација во Скопје.
