Фудбалерите на Лацио стигнаа до драматична победа од 2-1 против жилавиот Сасуоло, но триумфот остана во сенка на тажната слика на стадионот „Олимпико“. Иако „небесно-сините“ со овие три бода конечно пробија во топ 10 во Серија А, славјето беше тивко, бидејќи најверните навивачи продолжија со својот бојкот.
Фудбал во „театарска“ атмосфера
Највпечатливиот момент од натпреварот не беше голот во финишот, туку ехото кое се слушаше низ празниот стадион. Поради протестите против претседателот Клаудио Лотито, ултрасите на Лацио повторно ја оставија својата трибина празна. На огромниот „Олимпико“ беа присутни само околу 5.000 навивачи, што направи еден ваков важен натпревар да наликува на пријателски тренинг во пандемиско време.
Малдини во стилот на татко му, Лауриенте со „проектил“
Натпреварот започна како од бајка за домаќините. По само 80 секунди игра, Даниел Малдини одлично се снајде по еден отпадок во шеснаесеттникот, „легна“ еден дефанзивец на Сасуоло и рутински погоди за 1-0. Лацио доминираше, но Сасуоло, кој беше во одлична форма, полека се враќаше во игра.
Израмнувањето дојде во 35-та минута со вистинско ремек-дело. Арман Лауриенте испрати вистинска „бомба“ од 14 метри која заврши во самиот агол од голот на младиот дебитант Едоардо Мота, кој застана меѓу стативите на местото на повредениот Проведел.
Марушиќ ја искористи паниката на Муриќ
Вториот дел донесе голема борба и нови главоболки за Лацио, кој поради повреди ги загуби Каталди и Ромањоли. Младиот голман Мота се истакна со две одлични одбрани спречувајќи пресврт, додека на спротивната страна Исаксен промаши празен гол.
Кога се чинеше дека Сасуоло ќе си замине со бод, во 92-та минута голманот на гостите, Аријанет Муриќ, направи катастрофална проценка. Излета во празно при еден центаршут на Канчелиери, а Адам Марушиќ со глава ја испрати топката во небранетата мрежа за конечни 2-1.
Со оваа победа Лацио се искачи на 10-то место на табелата, но прашањето останува – колку долго клубот може да функционира без поддршката од своите „Лацијали“?
