Ракометна Македонија викендов се сели во Охрид, каде домашниот ГРК Охрид го пречекува тимот на Алкалоид во натпревар кој директно може да го одреди патникот во Европската лига. Влогот е огромен, а атмосферата веќе се загрева благодарение на пораките од таборот на охриѓани.
„Финале“ пред домашната публика
Еден од клучните играчи на Охрид, искусниот Вуко Борозан, не крие дека овој дуел за него и неговите соиграчи има тежина на финале. Црногорецот смета дека победата на овој меч е клучна за исполнување на сезонските цели и излез на меѓународната сцена.
„Ова е натпревар на сезоната за нас. Влогот е огромен – пласман во Европската лига. Очекувам тврда битка со многу дуели, каде одбраната ќе го има последниот збор. Оној што ќе биде поцврст во дефанзивата, тој ќе ги однесе бодовите. Се надевам дека тоа ќе бидеме ние“, истакна Борозан.
Повик до „Рибарите“ за пеколна атмосфера
Искусниот бек знае дека поддршката од трибините во салата „Билјанини извори“ е честопати пресудна кога се играат вакви неизвесни натпревари. Тој ги повика навивачите да бидат ветерот во грб кој ќе ги носи до триумф над силниот противник.
„Ги повикувам сите Охриѓани да дојдат во сабота и да бидат нашиот осми играч. Ни треба нивната енергија за да го добиеме ова финале“, додаде црногорскиот интернационалец.
Натпреварот меѓу Охрид и Алкалоид е закажан за сабота, со почеток во 18:00 часот.
