Бем Адебајо се бранеше од критичарите исто толку успешно како што ги напаѓаше Вашингтон Визардс претходната вечер. Ѕвездата на Мајами Хит, кој го постигна вториот највисок број на поени во историјата на НБА (83), конечно проговори за сите негативни коментари околу „етиката“ на неговата игра и рекордниот број на слободни фрлања.
„Напаѓав големина, не се извинувам за тоа“
Критичарите го нападнаа Адебајо дека Мајами намерно правел фаули врз противникот за да добие повеќе време во нападот за Бем, како и за неговите 43 изведени слободни фрлања. Но, центарот на Хит имаше подготвен одговор:
„Прво, не ме обвинувајте мене, обвинете го нивниот тренер. Ме остави да играм еден-на-еден додека не стигнав до 70 поени. Имав 70 поени на девет минути до крајот – навистина мислите дека нема да одам до крај? Кој би му рекол на тренерот: ‘Знаеш што, извади ме од игра’? Не бидете смешни“, изјави Адебајо по победата над Милвоки.
Тој додаде дека луѓето се гневни бидејќи никогаш не биле толку блиску до „бркање на големината“ и дека поентата на рекордите е токму тоа – да бидат соборени.
Рекордот на Коби Брајант беше метата
Адебајо призна дека кога видел оти е блиску до легендарните 81 поен на Коби Брајант, едноставно не можел да застане. Со двете слободни фрлања на една минута до крајот, тој стигна до бројката 83, со што го потисна Коби на третото место на вечната листа (зад Вилт Чемберлен).
„Јас сум фан на Коби. Стигнав блиску до неговиот рекорд и секако дека ќе се обидам да го соборам. Прилично сум сигурен дека и самиот Коби, да имаше 70 поени на девет минути до крајот, немаше да седне на клупа. Бидете сериозни“.
Тренерот Споелстра застана зад својот играч
И додека социјалните мрежи „горат“ со дебати за тоа дали 36-те погодени слободни фрлања (од 43 обиди) се „вистински“ кошаркарски начин за постигнување рекорд, Ерик Споелстра беше јасен: „Не му се извинувам на никого!“.
Бем натпреварот против Милвоки го заврши со 21 поен, видно исцрпен од историската вечер, шегувајќи се дека сега му треба рампа за да се качи по скалите. Но, едно е сигурно – каде и да се појави во Мајами, навивачите веќе му скандираат само една бројка: 83!
