Јувентус полека ја враќа својата препознатлива форма и запиша уште една важна победа во Серија А, овојпат минимална, но заслужена на гостувањето кај Удинезе со 0-1. Човек на одлука повторно беше Жереми Бога, кој игра во неверојатна животна форма.
Бога не застанува – трет меч по ред со гол
Иако Јувентус настапи без повредениот Душан Влаховиќ, нападот функционираше одлично со Кенан Јилдиз како „лажна деветка“ и разиграниот Бога. Токму ова дуо го реши натпреварот во првото полувреме.
По една долга топка, младиот Јилдиз мајсторски ја избегна офсајд стапицата и го пронајде Жереми Бога, на кој не му беше тешко од непосредна близина да ја смести топката во мрежата. За крилниот напаѓач ова е трет натпревар по ред во италијанскиот шампионат на кој успева да се запише во листата на стрелците.
ВАР го поништи голот на Консеисао, Окоје го спаси Удинезе
Јувентус доминираше во поголемиот дел од мечот и создаде голем број шанси, но голманот на домашните, Мадука Окоје, имаше неколку спектакуларни одбрани, запирајќи ги ударите на Локатели, Камбијазо и Мирети.
Во 70-та минута, „бјанконерите“ мислеа дека ја запечатија победата кога Франсиско Консеисао постигна прекрасен погодок по асистенција на Јилдиз. Сепак, по интервенција на ВАР собата, голот беше поништен бидејќи Теун Купмајнерс се наоѓаше во офсајд позиција и му го попречуваше видот на голманот.
Удинезе имаше своја колосална шанса за израмнување преку Екеленкамп, кој неспретно реагираше пред самиот гол на Перин, но Јувентус на крајот успеа да го сочува водството и да ги однесе трите бода за Торино. Лоша вест за тимот на Спалети е повредата на Кефрен Тирам, кој предвреме го напушти теренот.
