Никола Јокиќ продолжува да доминира на американските паркети. Српскиот центар синоќа режираше уште една партија за паметење, предводејќи го Денвер до тесна победа над Феникс во натпревар кој се решаваше во последните секунди.
Феникс Санс 123 – 125 Денвер Нагетс
Никола Јокиќ го забележа својот 29-ти трипл-дабл во сезоната, а неговата статистика изгледаше застрашувачки: 23 поени, 17 скока и рекордни 17 асистенции. „Џокерот“ не само што го разигруваше тимот, туку и го постигна клучниот кош за водство на 11 секунди пред крајот.
Девин Букер (22 поени) имаше шанса за победа со тројка во последната секунда, но топката излезе од обрачот. За Денвер, кој конечно е блиску до комплетирање на тимот по повредите, Џамал Мареј додаде 21 поен.
Њујорк Никс 121 – 116 Њу Орлеанс Пеликанс
Џејлен Брансон е во животна форма! Со 32 постигнати поени, од кои дури 15 во последната четвртина, тој ги предводеше Никс до седмата победа по ред. Со овој триумф, Њујорк (48-25) сега е „залепен“ до Бостон во борбата за второто место на Истокот. Карл-Ентони Таунс помогна со дабл-дабл учинок од 21 поен и 14 скока, додека кај Пеликанс најдобар беше Зајон Вилијамсон со 22 поени.
Шарлот Хорнетс 134 – 90 Сакраменто Кингс
Шарлот приреди вистински дебакл за Сакраменто, израмнувајќи го клупскиот рекорд со 26 погодени тројки. Коби Вајт погоди шест пати зад линијата за три поени (вкупно 27 поени), додека ЛаМело Бол додаде 20 поени. Кај Хорнетс блесна и дебитантот Кон Кнупел, кој со своите 247 тројки во сезоната изби на второто место во историјата на франшизата, веднаш зад Кемба Вокер.
Кливленд Кавалирс 136 – 131 Орландо Меџик
Донован Мичел повторно беше „кошмар“ за Орландо. Со 42 поени, Мичел по шести пат сезонава ја проби границата од 40 поени, потврдувајќи дека Меџик му е омилена жртва (просек од 27,2 поени во кариерата против нив).
Голема поддршка доби од Џејмс Харден, кој уфрли 26 поени, додека Еван Мобли беше совршен од поле со 8/8. Кај Орландо, Паоло Банкеро постигна 36 поени, но тоа не беше доволно да се прекине серијата од шест порази.
