Македонската фудбалска експедиција е подготвена за еден од најголемите предизвици во поновата историја. На официјалната прес-конференција пред баражот со Данска, капитенот Енис Барди испрати смирена, но одлучна порака дека „рисовите“ не се плашат од улогата на аутсајдер и се подготвени да ги искористат своите адути на „Паркен“.
„Функционираме како едно“
Барди, кој ќе ја предводи Македонија во отсуство на неколку клучни имиња, истакна дека атмосферата во националниот тим е на највисоко ниво и дека новите фудбалери веќе се целосно интегрирани во системот.
„Добро ги анализиравме и ги подготвивме сите детали. Свесни сме против кого играме и што нè чека, но и ние имаме свои адути. По претходните натпревари извлековме важни лекции и тие ни помогнаа да се подобриме како тим. Новите играчи се вклопија одлично и атмосферата е на високо ниво – функционираме како едно“, изјави Барди.
Мотивот е поголем од притисокот
Данските медиуми веќе почнаа да ја префрлаат фаворитската улога целосно на својата репрезентација, но токму тоа е горивото за македонскиот капитен и неговите соиграчи.
„Во вакви натпревари мотивацијата никогаш не недостасува. Потценувањето само дополнително нè мотивира. Поддршката од навивачите секогаш ја чувствуваме и ќе дадеме сè од себе да ги направиме горди на теренот“, дециден е лидерот на македонскиот среден ред.
Македонија влегува во овој дуел со јасна мотивација, а Барди ќе биде клучниот човек кој ќе треба да го контролира темпото на игра против агресивните Данци. Натпреварот се игра утре со почеток во 20:45 часот.
