Македонскиот ракометен бренд ГРК Охрид е на чекор до испишување на нова златна страница во својата историја. Во првиот натпревар од четвртфиналето на ЕХФ Европскиот куп, избраниците на Борис Ројевиќ одиграа беспрекорен меч во Пиреја и славеа над грчкиот гигант Олимпијакос со убедливи 31-26.
Овој триумф не е само обична победа, туку сериозна најава дека Охрид има капацитет да го повтори успехот на Алкалоид од минатата година и да го задржи европскиот пехар во македонски раце.
Лиапис и Пилиповиќ – клучните фигури во грчкиот пекол
Иако се соочија со специфични услови и тренинзи во „балон“ наместо во салата, охридските „гладијатори“ покажаа неверојатен карактер. Клучната предност беше направена уште во првиот дел. По почетното испитување на силите, Охрид влезе во серија и со водство од 10-7 најави во кој правец ќе се движи средбата. На пауза се замина со високи 14-8, период во кој одбраната на македонскиот тим беше како кинески ѕид.
Најголемиот „кошмар“ за Грците беше нивниот сонародник во дресот на Охрид, Николаос Лиапис, кој постигна 8 гола и беше незапирлив од линијата од шест метри. На голот, пак, блескаше Кристијан Пилиповиќ, кој со 15 интервенции (вклучувајќи зицери и пенали) ги доведе до лудило домашните ракометари.
Савас погодуваше, но Охрид победуваше
Олимпијакос се обиде да се врати во игра преку расположениот Савас, кој заврши со неверојатни 14 гола, но стратегијата на Ројевиќ беше јасна – нека погодува еден, додека останатите се целосно затворени. Токму тоа се случи, бидејќи Олимпијакос немаше друг расположен поединец кој би ја загрозил победата на нашиот претставник.
Во финишот, кога домаќините се обидоа да притиснат и намалија на 24-27, Ројевиќ со навремен тајм-аут ги смири страстите. Головите на Прибетиќ и Јагуриновски во последните минути само ја запечатија големата победа од пет разлика.
Покрај Лиапис, во листата на стрелци кај победникот се истакнаа и Анте Иванковиќ со 7 гола, додека Срмљан и Прибетиќ додадоа по 4.
„Билјанини Извори“ ќе врие на 4 април
Со овој капитал од пет гола, Охрид се враќа дома како голем фаворит. Реваншот е закажан за 4 април во СРЦ „Билјанини Извори“, каде се очекува пеколна атмосфера и потврда на пласманот меѓу четирите најдобри тимови во Европа.
