Изминатата ноќ во НБА лигата донесе неколку неверојатни индивидуални постигнувања кои ќе останат запишани во историските книги. Додека Леброн Џејмс израмни еден од најголемите рекорди на сите времиња, младиот Виктор Вембањама покажа зошто го сметаат за вонземјанин на кошаркарскиот терен.
Мајами со серија 14-0 ги „сопре“ 76-ерс
Мајами Хит покажа неверојатен карактер на домашен терен и со фуриозна серија од 14-0 во самиот финиш успеа да го победи тимот на Филаделфија со 119-109. Тајлер Хиро беше незапирлив со 30 поени, додека Бам Адебајо доминираше со 23 поени и 16 скокови.
Кај гостите, Џоел Ембид постигна 26 поени, но тоа не беше доволно да се сопре налетот на Мајами, кој со оваа победа ги задржа реалните шанси за директен пласман во плејофот.
Историски рекорд на Вембањама во Сан Антонио
Виктор Вембањама продолжува да ја шокира кошаркарската јавност. Во победата на Сан Антонио над Чикаго Булс (129-114), младиот Французин постигна рекордни во сезоната 41 поен и 16 скокови. Она што е фасцинантно е дека Вемби го запиша најбрзиот дабл-дабл во историјата на НБА за кој му беа потребни само 8 минути и 31 секунда на паркетот за да стигне до двоцифрен број на поени и скокови. Ова беше деветта последователна победа за „мамузите“.
Леброн се израмни со Карим, Лејкерси сигурни и без Дончиќ
Лос Анџелес Лејкерс го прегазија Вашингтон со 120-101. Иако играа без суспендираниот Лука Дончиќ, Леброн Џејмс со трипл-дабл учинок (21 поен, 12 асистенции, 10 скокови) го предводеше тимот до 12-та победа во последните 13 меча. Со овој триумф, Леброн стигна до 1.228 победи во кариерата (вклучувајќи го и плејофот), со што го израмни рекордот на легендарниот Карим Абдул-Џабар за најмногу победи во историјата на НБА лигата.
Гилџус-Александер со 47 поени ја донесе 60-тата победа за Тандер
Оклахома Сити Тандер стана првиот тим што стигна до границата од 60 победи оваа сезона по триумфот над Детроит по продолжение (114-110). Актуелниот МВП, Шеј Гилџус-Александер, одигра монструозна партија со 47 поени, погодувајќи дури 21 слободно фрлање од 25 обиди. Со ова, тој го продолжи својот рекорд на 136 натпревари по ред со најмалку 20 постигнати поени.
Атланта не запира на домашен терен
Атланта Хокс ја забележаа својата 13-та последователна победа во својата сала, совладувајќи го Бостон Селтикс со 112-102. Ониека Оконгву и Џејлен Џонсон беа лидери со по 20 поени. Кај Бостон, кој играше без Јејсон Тејтум, најдобар беше Џејлен Браун со 29 поени, но очајната трета четвртина ги чинеше гостите пораз.
Феникс „прошета“ низ Мемфис
Феникс Санс беа немилосрдни на гостувањето кај Мемфис Гризлис, победувајќи со убедливи 131-105. Првата ѕвезда на тимот, Девин Букер, беше во извонредна форма и уфрли 36 поени со одличен шут од игра (16-24). Санс ја осигураа победата со голема серија во четвртата четвртина, предводена од резервистот Колин Гилеспи.
Минесота го покори Далас, Маверикс во агонија
Минесота Тимбервулвс лесно поминаа низ Далас, победувајќи ги Маверикс со 124-94. Натпреварот го одбележа враќањето на Ентони Едвардс по повредата (17 поени), додека Џулиус Рендл постигна 24 поени против тимот од својот роден град. Далас продолжува со катастрофалните резултати на домашен терен, запишувајќи го 13-тиот последователен пораз пред своите навивачи.
Мобли и Мичел ги „растурија“ Џез
Кливленд Кавалирс славеа на гостувањето во Солт Лејк Сити против Јута Џез со 122-113. Еван Мобли и Донован Мичел беа незапирливи за одбраната на домаќините, постигнувајќи по 34 поени. Мобли додаде и 16 скокови со три блокади, додека Џејмс Харден помогна со 13 поени и 14 асистенции за петтата по ред гостинска победа на „коњаниците“.
